Market Insight：港股沽壓恐有增無減

講真，早前美股升浪主要由FAANG（Facebook、Amazon、Apple、Netflix、Google）帶動，有分析指標普500指數年內升幅有近半由FAANG貢獻，並吸引部分交易所買賣基金（ETF）納入其指數內。如今科技股由強轉弱，所以早前追落的貨未來隨時嘔凸，且近日納指插完輪到道指跌，睇怕美股風雨飄搖的日子可能唔短。

大戶順勢質低屠牛

睇番恒指昨日跌150點收報28,583點，跌幅唔算大，但最慘係50天線確認失守250天線，後市係咪真係會跌唔停就未知，不過勢必增加技術分析派進一步沽貨意欲。大戶早前忍一忍手，唔出力質低個市，可能就睇到牛仔街貨唔夠吸引，所以養住批牛仔先。不過，現時恒指牛證街貨重貨區為28,200至28,266點已有相等於2,031張期指合約，而現價只相距不足400點，大戶唔使再忍，必會順勢屠牛。

失去股王光環的騰訊（00700），近期跌勢既狠且急，加上阿里巴巴及京東話擱置中國預託證券（CDR）回歸A股計劃，市場擔心內地CDR隨時胎死腹中，小米集團（01810）獨力承壓，昨日跌5.7%收報17.6元，股價唔經唔覺又返回招股價附近。

兩大重磅科技股表現更拖累成個板塊，金蝶國際（00268）、中國擎天軟件（01297）及金山軟件（03888）股價最少都要跌逾4%。既然板塊氣氛咁弱，短期都係睇少瓣。

再睇港交所（00388）昨日穿頭破腳，一支大陰燭。如果話騰訊同佢係領先指標，咁未來港股就真係好唔樂觀。投資者就算唔採取「現金為王」策略，古勝建議都將部分倉位轉至防守力較強或前景較佳之板塊上，例如本地銀行股、公用股、REITs及內需股，以求盡量減少潛在帳面損失。

家陣唔講基本因素

在下早前提過，現時港股熊蹤處處，前排的強勢股隨時成為主力「提款」對象，近期見並無大利淡消息的教育股陸續回軟，其中民生教育（01569）、中教控股（00839）及宇華教育（06169）走勢唔多靚仔，加上行業平均市盈率約21倍，明顯貴過恒指的12倍，被沽有理！

當然，大家仍然可以講得出一大推利好因素，如民眾收入增加，有利投入子女教育開支、國策推動私營教育企業發展等，但現實係，市場氣氛明顯轉差，投資者要錢唔要貨，所以估值高已係死罪。故已持貨者應趁高減磅，以免出現人踩人事件時至走貨就悔不當初。

古勝