絲絲講場：黃凱明闊別兩年 回歸港交所
香港交易所（00388）最近有猛人回歸！講緊嘅係該所前首席法律顧問及法律服務部主管黃凱明（Christine），佢月前重返港交所，做咗主席史美倫嘅左右手，出任其資深顧問。
任職顧問處理策略事務
Christine曾經喺港交所工作六年，處理過多項複雜嘢，好似滬港通特別獨立戶口服務、場外結算公司等；更喺一一年獲Asian Legal Business選為全年最佳公司內部律師（In-house Lawyer）。佢一六年上半年因為家庭原因向港交所辭職。
今年四月底，史美倫接替周松崗做主席，史美倫就邀請Christine返嚟幫佢手做資深顧問，處理一啲策略事務。事關Christine喺香港證監會同港交所都工作過，有相關經驗，而且兩人喺證監會曾經共事過，早已認識對方。
雖然Christine今次返港交所做資深顧問唔係全職，但佢出名做嘢搏命，所以絲絲諗，就算係兼職，佢都實做足100分！
公關一姐離巢 外地進修
另一方面，港交所公關「一姐」企業傳訊主管陳涓涓（Lorraine）就八月尾開始離職前休假。絲絲聽聞佢將另有發展，但會先休息一下，九至十月會到外地修讀短期課程，返嚟開創人生事業嘅「下一站」。
咁又係，Lorraine喺交易所工作廿年，處理過多個大Project，好似重塑集團品牌形象、將企業傳訊帶入電子化領域等，亦參與過無數大Event，史美倫亦好支持其部門嘅工作，相信佢出去會再闖事業高峰。
余絲韻