Market Insight：分兩注作長短線部署

恒指昨日最終跌幅雖收窄至370點，收報28,311點，而主板成交959億元亦唔算多，但總體上仍令人感覺悲觀。講真，環球不明朗因素仍多，單係中美貿易戰，似乎兩國已轉向硬碰硬，未來全球受影響的範圍逐步擴大已無懸念，相信最終只有輸家無贏家。

其次係，內地股市受人仔貶值、走資、債務爆破危機以及金融去槓捍化等種種因素困擾，昨日滬綜指跌1.7%報2,777點，重新失守2,800點關口，走勢利淡。

資金湧向美元資產

至於英國脫歐大臣及外相先後劈炮，令首相文翠珊陷入逼宮危機，脫歐之路難行。最後，雖然意大利近期信用違約掉期（CDS）未見再飆高，但此乃歐洲區之潛在危機，隨時有爆發可能。由此可見，環球避險需求仍大，資金流向美元資產的趨勢料持續，「港股提款機」繼續運作的機會頗大。

走勢上，恒指周二彈到上28,981點後昨日再跌過，失守10天線之餘仲加多個28,682至28,365點下跌裂口。雖然短期唔跌穿年內低位27,830點，大家都未必會太驚，但最怕係港股彈唔起，並將橫行區一級級咁下移，到時散戶要止蝕，要闖過心理關口的難度會大增。

古勝好耐之前已講過，唔好多手掂內房板塊。內媒日前又指「整治樓市亂象不能留死角，下半年要加大對樓市亂象懲處和治理力度」，樓市調控料繼續按「房住不炒」施策。

由於內房股本已受多重負面消息拖累，如今再加多一腳，難怪昨日無論是龍頭的中國海外（00688）及萬科企業（02202），抑或是富力地產（02777）、雅居樂（03383）及中國奧園（03883）等跌幅都唔細，睇怕整個板塊一年半載都難有運行。

策略上，現時要從港股中挑選可供短炒個股難度頗大，故不妨在部署上分成兩注，以長短線兩個方向入市。

騰訊基本面仍穩定

首先，將部分資金放在市場當下聚焦的個股身上，例如今期見衍生工具資金明顯追住隻小米（01810）來炒，反之騰訊（00700）鑊氣減弱（這從兩者昨日成交分別為72億元及92億元可見一二），故若有膽量又輸得起，不妨小注買番隻小米Call短炒。

至於長線方面，則應趁機會做定功課揀選優質股。雖然騰訊近期股價走勢確實係差，惟公司基本面變化不大，就算美國科技股近期似有回軟之勢，但反而可成為長線低吸時機，故值得等候港股大平賣出現時，分注吸納。

值得一提，昨日部分教育股逆市做好，新高教集團（02001）升2.5%，成實外教育（01565）則升1.8%。雖然話這個板塊較少受貿戰影響，但早前已累升不少，日後或成為大戶「開刀」的主力對象，計計條數都係博唔過！

古勝