絲絲講場：港交所擇日開P 賀新舊經濟股

首隻H股掛牌25周年

小米集團係WVR「第一股」，小米創辦人雷軍肯定會被邀請出席，而首隻H股，即內地註冊香港上市嘅國企股青島啤酒（00168）嘅高層代表，亦肯定會獲邀。嘩！即係個大型慶祝派對，新、舊經濟嘅代表人物都會嚟齊，真係未舉行已先轟動！

青啤喺九三年七月十五日上市，而小米就預計會喺下月九日上市，都係七月咁啱！不過個「H股+新經濟股」Party，聽講應該唔會喺埋七月九日搞，可能會於今年稍後時間舉行，日子仍待定。

講起小米上市，佢哋尋日舉行投資者推介會，吸引大批傳媒到場等雷軍，午餐會中午12點45分先開始，雷總12點10分已現身，不過佢一到就走入貴賓房，睇嚟佢好心急要同投資者Social喎。結果要公關公司出面，希望安排佢出嚟畀傳媒影張相。

雷軍身家料逾千四億

雷總好明顯低估咗自己號召力，搞到約50名記者朋友逼喺會場走廊喺咁等，場面相當混亂。等咗半個鐘，雷總終於笑容滿面，施施然咁帶住一眾小米管理層現身，臨離開時仲相當風騷同傳媒話：「我們禮拜六（招股記者會）再說、再見！」睇嚟即使小米集資額同估值都大縮，絲毫無損雷總自信！

咁梗係，事關小米若以招股價上限22元上市，以雷總持股量計，身家帳面超過1,400億元，好難冇自信！

每位出席嘅投資者仲有紀念品收，包括小米手環、外置充電器、價值9.9元人仔嘅環保電池，仲有配備瑞士進口筆芯嘅小米原子筆一支！

余絲韻