絲絲講場：內地券商狂縮皮 員工「食」自己

大環境確實差咗，中國證券業協會統計數據都話，上一季131間證券公司合計營業收入659.64億元人民幣，較上年同期少咗超過7.2%。同時，員工薪酬同比都跌咗3%，咁「順手」Cut埋福利都好順理成章。

之但係，香港呢邊暫時未見受影響。

香港包伙食 新增勤工獎

幫中資券商打工嘅大中華投資策略研究學會副會長（港股）李偉傑（Jason）透露，負責結算等內部同事每日有約70至80蚊飯錢，要拎單實報實銷，用唔晒就冇，所以Jason見佢哋食完飯，時常再買多廿蚊生果湊夠數。佢話呢個津貼上年初開始有，可能係同內地接軌吧，但就呻自己負責對外，冇得拎公司膳食津貼囉。

包午膳嘅仲有耀才證券，聽該行行政總裁許繹彬（Edmond）講，總行同事由公司包伙食叫外賣，分行同事每人每日都有約40元，方便大家中午時段都可為客戶提供服務。

Edmond補充，今年年初公司仲新增勤工獎，只要同事返足工、冇遲到早退，一個月就有多500蚊，好多同事近月都拎到。另外，公司仲有獎金獎勵接最多客戶電話、又或開最多戶口嘅同事，一個月最多可以有成萬蚊（o架）！

至於致富證券，佢哋證券業務部主管郭家安話公司雖然冇包伙食，但就有醫療、進修等津貼，每年仲會有公司旅行，好似啱啱復活節就有30多名同事一齊去咗馬來西亞玩。邊個有得去旅行，佢話係抽籤決定，不過如果上年抽中咗，今年就冇得再抽，所以個個總有機會有份去玩。

余絲韻