絲絲講場:英Sir為股評人開精神病院?

內地開咗間「股評家康復中心」?!主要服務精神病者?聽基金經理黃國英(英Sir)講,原來有段古!

話說英Sir今個佛誕假期提前喺十九日出發前往遼寧,同行仲有香港股票分析師協會永遠榮譽會長藺常念。但兩人唔係去公幹,而係有重要任務在身,就係出席佢哋有份捐資興建嘅醫院落成驗收儀式!

捐咗50萬 服務精神病人

絲絲聯絡到身處遼寧嘅英Sir,佢話其實香港股票分析師協會喺松峰慈善基金中國健康工程籌建嘅醫院項目捐資興建咗三家「股評家醫院」及一家康復中心,其中康復中心以「股評家康復中心」命名,係由佢本人同個會合共捐資50萬元興建,主要服務精神病人,類似中途之家。

今次參與善舉有咩感受?佢話覺得內地仲有好多人需要幫助,又提到今次捐助項目頗具效率,頭尾僅用了18個月就完成建築工程,等添置傢俬就可投入營運。

見到網友喺英Sir Facebook睇到「股評家康復中心」呢個名都有啲聯想,絲絲當然代Fans問吓點解會起呢個名。佢話就因為個康復中心係股評家協會有份捐錢興建咁簡單,咁大家係咪諗多咗嘞!

余絲韻