Market Insight:中海油候調整撈貨

個市近排其實幾奄悶,上周股王騰訊(00700)公布首季業績後股價大反撲,結果成個星期埋單計數,恒指仍跌74點。本周二佛誕假期,跟住下星期又到期指結算,話唔埋個市隨時悶到落六月都唔定。

中美貿易摩擦,經過近三個月拳來腳往,終於塵埃落定,上周六傳來消息話雙方達成協議,中國向美國提議把每年貿易順差削減2,000億美元。其實中美貿易不平衡的問題,冰封三尺非一日之寒。

美國人習慣洗腳唔抹腳,高負債低儲蓄又想大花筒,結果每年要靠中國為首的新興市場進口大量廉價商品;同一時間,又怕人哋賺完美元買返美國高端科技及精密設備,返去進行逆向工程,照抄之後挑戰美國的一哥地位,結果科技產品出口長期諸多阻撓,形成不對等的貿易成為長期問題。

市場一早睇通結局

到底點先可以不互徵關稅之下,中國單靠買多啲美國大豆同粟米,就可以收窄每年二千多億美元的貿易盈餘?睇怕講就容易做就難。

其實,美國豈會唔知倘若真係打貿易戰,最終雙方都會成為輸家。收窄貿易不平衡為名,搵着數為實,今次中國畀足面讓美國攞彩,令「侵侵」對一眾美國優先主義的支持者有晒交代,中國打條金樓梯等「侵侵」好落台,兼為年底中期選舉鋪路。

但話說回來,過去三個月股市對中美隔空口水戰,驚訝反應一次細過一次,可見聰明腦袋一早當正兩國耍花槍,最終「床頭打交床尾和」,也因為咁,好難期望皆大歡喜的結局,對股市會有重大刺激效果。

近日美元愈升愈有,上周美匯指數升抵93.7水平的今年新高,由二月低位起步累升逾6%。在加息及美國減稅後誘使企業資金回流,紛紛重返美元資產。新興市場匯價卻持續面對走資壓力,靜咗一排,港匯又貼近7.85弱方兌換保證水平橫行,使上周金管局頻頻接貨,本周中銀行體系結餘落到1,094億元,是逾九年新低。

即使有估計結餘落到五至六百億元,問題依然不大。不過,拆息追貼美息始終會對股市有一定心理負擔,亦係千祈咪因為貿易糾紛暫告落幕,對股市過分樂觀的理由。

沙特為自己托油價

古勝喺四月時提過,沙特阿美一日未正式招股上市,在油組一哥沙特阿拉伯不斷的搞小動作托住油價,爭取最大的套現效果,國際油價想大跌都幾難。

石油股絕對是大市缺乏方向底下最佳盲公竹,推介至今,中海油(00883)累升12.4%,中石油(00857)升10.9%,中石化(00386)升9.4%,即使稱唔上大茶飯,勝在唔使理個市好似梅花間竹日升日跌,穩穩陣陣保住個本。「三桶油」上周五升得急,未上車可以留意住中海油,本周能否回落番些少,等14至14.2元再撈過。

古勝