Market Insight：大灣區概念股跟勢炒

另一方面，呢期港股升市成交未係好配合，加上見隻騰訊業前受壓，好友追貨正常都忌三分。無論如何，暫時無論做好做淡，都唔爭在睇定啲再行動。

昨日有個板塊算係跌市奇葩，就係醫藥股。白雲山（00874）股價破頂，升幅達11.9%，石藥集團（01093）升逾4%，同仁堂科技（01666）、麗珠醫藥（01513）、國藥控股（01099）及東陽光藥（01558）均高收作結。似乎每次大市回吐，資金都視醫藥股為樂土，板塊始終係相對強勢！

雅居樂小注一試

除醫藥股之外，呢幾日唔少大晒士股派息除淨，吸引好息之徒目光。就如港鐵公司（00066），派發末期息每股0.87元，本周五除淨，昨日股價逆市升近1%。周內陸續派息除淨的股份，還有農業銀行（01288）、長城汽車（02333）、滙豐控股（00005）同恒生（00011）等，料相關股份短線表現可強於大市。

盛傳粵港澳大灣區規劃將於月內出台，北方股友仲話好大機會係今個星期添。個別具大灣區概念的中資股亦見逆市做好，其中一隻係香港中旅（00308），高位見過3.35元，收報3.25元，升2.8%，成交1.7億元，一係唔發市，一發市已連升三個交易日，且成交明顯增加，論走勢算係成功突破，短線守3.1至3.2元區域應該仲有水位。

此外，見到越秀地產（00123）、越秀房產信託基金（00405）亦逆市高收。食住呢條水，大家可以睇實隻雅居樂（03383），昨日逆市升0.98%，收報16.52元，股價唔係幾肯落，似乎有勢要突破52周高位17.84元，可小注順勢而為。

中資電訊股欠亮點

三大中資電訊股講分拆鐵塔公司上市，經已講咗兩三年，近日終於有消息指，鐵塔公司遞交H股上市申請，估計集資額達數百億元。

不過，三大中資電訊股表現不一，中國聯通（00762）今日除淨，唔知係咪有搶息活動，昨日升1.65%收報11.08元，跑贏同業，中國移動（00941）及中國電信（00728）則一個微跌一個微升。三大電訊股中，仲係聯通比較揀得落手，但整個板塊而言，如果撇除分拆鐵塔公司的消息，老實講，又真係唔見得有咩亮點！

古勝