絲絲講場：遭前妻換走天價名畫債王懵足年半
得罪女人有乜後果？「債王」格羅斯（Bill Gross）就係例子，仲成為美國華爾街笑柄。皆因佢離婚後，先知畀前妻一早換走咗幅近3億港元名畫。
事緣美國傳媒近日踢爆，同「債王」結咗婚幾十年嘅Sue Gross喺一六年底申請離婚後，兩人同寢一室嘅畢加索名畫被換走咗。但「債王」傻更更咩都唔知，等佢晚晚仲以為自己望住幅傑作瞓。
呢幅畫係「Le Repos」，係一九三二年畢加索作品，畫中少女為畢加索情人熟睡嘅樣子。
離婚前幅畫係兩人共同擁有，舊年八月處理離婚時Sue獲判為名畫主人，當「債王」安排將名畫運往前妻家中，Sue一句秒殺：「唔使喇。」
真迹下周拍賣 估值三億
吓？咁益「債王」？舊年十一月，Sue喺法庭作證時承認換走名畫，但聲稱係「債王」同佢講：「可以攞走全部妳喜歡嘅家具同藝術品。」律師就問：「冇理由攞走咗幅畫，由得道牆吉咗……妳以假亂真？」Sue就認換咗自己畫嘅仿作上去。
跟住律師追問：「妳有冇冒埋畢加索簽名？」Sue答：「我唔記得點簽名，幅仿作我幾年前喺屋企畫，Bill都知……我係冇同佢講攞咗幅真迹之嘛，因為我哋已經年半冇偈傾。」
「債王」平時呼風喚雨，點知衰喺前妻手上！幅畢加索真迹下周會喺紐約拍賣，估值2,500萬至3,500萬美元（約1.95億至2.73億港元），怕且呢幅畫永世有段古嘞！
余絲韻