絲絲講場：唐宮乒乓波枱氹客開餐

擬年內開十間分店

餐飲股唐宮中國（01181）旗下休閒餐飲品牌店均設有乒乓波枱。佢哋首席財務官黃忠揚解釋，休閒餐飲品牌店主打玩味精神，張乒乓波枱其實亦係一張可容納12個人嘅飯枱，等顧客聯誼時可以多啲話題，甚至有機會打番場波，實行「乒乓外交」咁話。

咁點解唔揀高爾夫球？佢話乒乓波先夠親民，基本上人人都識打，就算唔叻都可以打「滴滴仔」。除咗「乒乓波飯枱」之外，連碗碗碟碟都預咗畀客人「打卡」，碗底或碟底印有蜜蜂或螞蟻圖案。

咁「呃like」法，難怪佢哋間休閒餐廳今年二月仲進軍台灣，以合營模式開分店啦，集團仲計劃今年內擴充分店5至10間添！黃忠揚更自爆，落餐廳開完會後，佢亦會同班同事打番場乒乓波，大家輕鬆吓，工作士氣都好啲！

余絲韻