Market Insight：後向未明宜保留實力
港股繼續在上落區內Chok上Chok落，恒指昨日重返30,400點樓上，收報30,402點，升408點，成交總算上番千億元樓上。藍籌中國神華（01088）及吉利汽車（00175）股價同飆半成，古勝常提及的蒙牛乳業（02319）亦升逾4%、瑞聲科技（02018）及舜宇光學（02382）升逾4%，股王騰訊（00700）亦重上390元樓上，但能唔能激起入市意欲，大家應該心中有數，都係繼續平常心看待上落市。
事實上，呢排個市上落幾百點，大戶只需要將騰訊舞高弄低就可以達到目標。好似昨日騰訊做好，隻中國移動（00941）單日沽空額就翻一番有多，似乎係有心托住指數然後沽其他藍籌。
減少槓桿 持盈保泰
常言道「十個牛皮九個淡」，又或者「久守必失」，在下就聽聞有一個陰謀論，話外資正在部署做空中國股、債市場，到時連港股同港匯通殺，故見港股唔上唔落咁耐，背後正係有大淡友在部署食大茶飯云云。
到底堅定流，古勝唔敢全盤否定，尤其係睇見騰訊股價唔對路，再加埋一批超高估值的內地獨角獸排隊來港上市，下一個股災會唔會就係由科網股引爆？再由地產和金融股接力崩盤？適逢時值內地「逢九必亂、逢八必災」之年，穩陣起見係持有一定比例的現金，減少槓桿，持盈保泰為上策。
穩穩陣陣，睇番隻半公用股。粵海投資（00270）從事供水、能源、路橋、物業、百貨及酒店業務營運，尤其佔大比例的供水業務收入相對穩定，公司派發末期息每股0.34元，將於六月十九日除淨。觀其股價企穩喺12元樓上，似乎有勢破頂（13元關），可以考慮小注一試，博財息兼收。
繼啤酒股翻炒之後，昨日內需炒風吹到去服裝同體育用品股身上，見到安踏體育（02020）股價創52周新高，李寧（02331）曾飆上9.19元，I.T（00999）及威高國際（01173）分別上升6.5%及4.6%。
內需股可鎖定利潤
不過，古勝總覺得，喺出口不濟之下，第二季內地經濟增長會有放緩壓力，眼下內需股炒風轉熱，除了在季內產品提價的啤酒股外，其他跟炒的股份，有貨可以考慮睇位逢高減持鎖定利潤，候低再睇位翻兜。
坊間傳聞小米IPO估值最多達800億美元。老實講，以一家未有盈利，單純講夢想的創科企業而言，呢個估值有點瘋狂！投資者唔係傻，斷估唔會咁貴去追。但咁大隻新股，又係同股不同權頭炮，Sell唔去又點收科？
依過往經驗，當市況牛氣沖天，市場資金充裕時，股市供大於求下，垃圾都可以炒到上黃金價錢。未來兩三個月會唔會見到呢個場面出現？反正直到呢一刻，在下都仲未想像得到！
古勝