絲絲講場：美圖蔡總自爆有萬個比特幣

佢早於○○年時炒網站域名賺到第一桶金，被內地封為「域名大王」，佢仲係內地著名天使投資人，投資唔少Startups（創新公司），內地科技投資者都睇實佢睇好啲乜。

頻撈貨 料仲有得升

佢呢排鎖定區塊鏈投資同比特幣，最近仲自爆至少已坐擁一萬個比特幣！以比特幣價格早排回升至1萬美元，計落佢手上嗰批市值差不多7.8億港元！

不過原來佢唔係揸咗好耐，佢話今年一月時只係揸個位數嘅比特幣當玩吓，之後睇好區塊鏈與比特幣係代表未來，先定落至少一萬個嘅目標。所以舊年十二月比特幣衝上兩萬美元高峰時佢冇入市，到今年一月底先逢低吸，最近宣告達標。佢仲話長睇比特幣必升。

至於佢另外投資咗嘅十幾個區塊鏈項目，雖有賺有蝕，不過佢話睇長線，只要你投中一個，回報就幾十倍！

講開又講，佢亦係中國天使會嘅成員，個會上月底仲首度喺香港搞咗個中國天使投資人大會。

中國天使會14位成員全部都係內地互聯網精英，包括小米創辦人雷軍及美團點評CEO王興等！搞鬼嘅係，呢幾位原來搵過蔡文勝投資，可惜佢冇參股，今時蔡文勝諗起都話「揼心口」！

余絲韻