孖妹S檔案：執靚個倉 幫組合變「盈」

了斷板塊：風險升溫 減持科技硬件

繆：荷寶亞太區股票聯席主管兼中國首席投資總監 繆子美

彩兒：今日係咩日子，你竟然喺度打掃。

Kitty：最近喺股壇上遭受唔少挫折，搞到我思緒混亂，我決定學億萬富豪蓋茨做家務減壓。

彩兒：睇嚟你終於明白我平日督促你做家務，係幾咁用心良苦。話時話，呢個股市真係唔識睇。

繆：大家要密切留意企業中期業績報告及中美貿易談判結果，預計十一月前，美國總統特朗普都會繼續利用中美貿易談判做籌碼，為中期選舉拉票。不過，對一八年全年港股表現仍有希望，以雙位數回報做目標。

地產銀行消費睇高一線

彩兒：有咩資產要同佢嚟個了斷？

繆：我建議減持科技硬件股，因為板塊受貿易戰陰霾影響，以及iPhone銷售放緩拖累，投資風險增加。另我看淡周期類股份，包括工業股、電訊及保險股等。中國積極推動5G發展，流動數據或語音收費或會降價，直接影響電訊股收入，令股價受壓。另外，保監會加強保險業務經營，變相令行內競爭更趨激烈，保險業生意難做。

Kitty：聽落真係股無可戀！騰訊控股（00700）上周竟跌穿380元，科網股今年點算？

繆：科網股無疑會有啲波動，但基本面仍唔錯，我會保持一定倉位。此外，對於有啲板塊，可睇高一線，包括地產、銀行、消費、體育用品、紙業、能源及水泥類股份。最近，我仲增持醫藥股，因中央積極推動醫療改革，加快新藥審批速度，所以有研發能力嘅醫藥股有更強增長潛力。

荷寶繆子美表示，投資者宜留意企業中期業績及中美貿易談判結果。	富邦潘國光稱，今年股市波動，下跌風險愈來愈大。	Chartwell Capital陳惠仁看好下半年後市，認為不少公司會有良好業績。

外圍預測：年中水緊 美元弱 人幣穩

潘：富邦銀行（香港）投資策略及研究部主管 潘國光

Kitty：一八年個市差成咁，莫非真係要同股票Say Goodbye？

潘：一七年市場好景，大量資金湧入市，但今年股市波動大，下跌風險亦愈嚟愈大，再難追逐板塊輪流炒，投資者宜減持股票，同時分散投資至避險資產。

Kitty：加息同縮表講咗咁耐，而且步伐都係循序漸進，仲有咩好怕喎。

潘：你有所不知，美國縮表嘅龐大規模，好多人知，但好少人提，少人關注。縮表每季都會加100億美元，今年第一季200億美元，四月就300億美元，七月400億美元，十月500億美元；再過多12個月，即一九年十月，就會累縮6,000億美元。預計歐洲可能第四季都零QE（量化寬鬆），美國就累縮6,000億美元，剛好抵銷日本逾6,000億美元QE。

忌太冒險 考慮高評級債

潘：由過去十年，全球有過萬億美元QE，到明年底，全球零QE，點到你唔擔心？息口上升，經濟增長放緩，企業發債及續債壓力增大，但借貸成本上升。我估計，市場年中會感受到環球流動資金緊絀。因此，呢十年受惠嘅資產會受影響。

彩兒：望落樣樣資產都會跌，點算好？

潘：又唔使咁驚。只要唔好咁冒險，收斂吓投資風險取態就好。依家要贏通脹唔難，可以考慮投資高評級債券，息率有逾三厘以上。先唔講美國十年期債息，一年期或兩年期嘅美債都超過兩厘息率，屬於高水平。相比負利率年代，目前債息的確吸引。

彩兒：投資中國國債又掂唔掂？

潘：提提你，可以比較一下中國國債及人民幣定存息率，因十年期國債息率僅3.6%，若定存息率都差唔多，咁定存短期啲，仲着數。

彩兒：最近美國十年期債息升穿3厘，市場點解咁驚？

潘：美國正處加息周期，並已啟動縮表，因素均會推高美息。十年期債息愈高，股市嘅合理價格自然跌。另債息升，令股息吸引力降。同時，Libor息率上升，香港Hibor都會跟升，企業借貸成本上升，香港股市及樓市都會受影響。

Kitty：人民幣會升值？

潘：人民幣過去大致上跟大隊走，年內升2至3%，而美匯指數弱，即人民幣變相強。因此，人民幣往後走勢要睇美元。目前，美國正遇上雙赤問題，包括財政赤字及貿易赤字等，所以美國負債多，想將來償還少啲，減少負債實際價值，就會想美元逐步貶值。

另外，過去一年加息，美元仍未見強勢，且美國比其他國家早加息，聯儲局加息會留意3個月倫敦銀行同業拆息3%嘅頂位，目前該利率已到2.3%水平，料加息周期或會提早完結。由此可見，人民幣沒有大幅貶值風險，就算面對中美貿易糾紛，中國已經明言，唔想用人民幣貶值嚟抗衡，反而主張以穩定人民幣匯率做誘因，吸引更多資金流入，加快人民幣國際化進程。

Kitty：人民幣走勢穩定，A股又會點？

潘：中港股市今年應該都係齊升齊跌，原因係於互聯互通之下，資金自由流通，兩地股市相連性增加。因此，當中美貿易談判有新消息，或內地推更好嘅國策，中港股市都會一齊Hit。

進攻靚股：恒指凡挫千點不妨入市

陳：Chartwell Capital首席投資總監 陳惠仁

彩兒：我呢啲小投資者資金唔多，難以做到大包圍。

陳：唔緊要。喺呢個市況下，其實應該逐隻股票分析。我今年都幾保守，只求一八年全年有10至12%回報，絕對唔貪心。港股始終係全球股市中最平，所以對於年內走勢，我仍幾樂觀。我以恒指30,000點為分水嶺，我建議，恒指每跌一千點，你就入市；到32,000至33,000點，每升一千點，你就沽啦。

Kitty：講幾個Number益吓我吖。

陳：年初好多股票都下跌，但我睇好下半年後市，覺得唔少公司會有良好業績，例如長江基建集團（01038）。長江基建股價由70元跌至60元附近，估值低，仲有超過3.84%的派息，可以逐少入貨。另外，長江基建有唔少英國業務，受惠上年年中英鎊開始呈強，長江基建收入增加，估計中期業績會反映到，料其股價會有更大增長動力。

遠展值博 騰訊莫追入

陳：另外，主營香港業務嘅香港企業大快活集團（00052），股價由33元跌至30元，而且有派息，如股價想升番一成，應該唔難。

我仲睇好遠東發展（00035），管理層積極拓展業務，住宅項目遍布澳洲、中國、香港、馬來西亞、新加坡及英國，息率超過4.2%，資產淨值（NAV）逾50%，所以值博率高。雖然講嚟講去都係呢啲股份，但所謂「橋唔怕舊，最緊要受」。

Kitty：你一路增持大快活及長江基建，咁沽咗咩貨？

陳：你有所不知，我哋公司一直有新錢流入，同時揸住唔少現金，所以唔使刻意沽貨。不過，賺夠食胡嘅就當然有。早前我哋沽咗中國軟件國際（00354）及華虹半導體（01347）。自中國軟件國際股價處4.3元開始，我就一路追入，直至5.8元，到7.2元沽咗部分。

另一方面，我哋喺華虹半導體股價見8元時買入，喺18元附近減持少少（陳惠仁成功避開近日軟件股急插一役）。再者，我調低咗國藥控股（01099）比重，由原本佔投資組合7%，下降至5%。

Kitty：你都係鍾情一啲Old School股份，睇嚟你係個長情嘅人。

陳：我冇買過騰訊控股，雖然股份基本面好，但現時追入，我覺得贏面唔大。

若有料報畀彩兒同Kitty或有嘢問，可電郵money.biz@on.cc

Kitty、彩兒