Market Insight：油價向上 睇好中石化

上周五港股趁美國科技股佳績反彈，保住三萬點關不特止，升272點收報30,280點。不過，北水拉閘下成交只得974億元，實在有結算日粉飾太平之嫌。美國公布第一季經濟增長2.3%，好過預期的1.8%，亦都向着狂人「侵侵」的目標3%走近一步。華爾街股市牛皮，道指跌11點收市，轉月後的恒期期貨，夜市臨尾愈抽愈高收30,190點，較日市再升127點，預示今早恒指可能開高100點左右。

五窮月要打醒精神

自一月尾、二月初，環球通脹預期升溫，市場估計聯儲局加息次數可能由三次增至四次，全球股市劇震之後，道指在23,300至25,800點之間大吹無定向風。港股有樣學樣，在29,500至32,000點之間浮沉。

資金流報告顯示，唔少大戶奉行有懷疑揸現金策略，二月以來美國互惠基金及ETF，累積錄得670億美元淨流出，單是二月就有410億美元淨流出，乃自○八年最大單月淨流出，難怪近月美股反彈，每次高位阻力愈壓愈低。

西方人話Sell in May and go away，港股有「五窮六絕七翻身」之說，即將進入五月，自然要打醒十二分精神。近排季績期有啲都幾出乎意料，中興通訊（00763）首季多賺39%，可惜被美國商務部制裁，股東只望復牌輸少當贏。比亞迪（01211）首季盈利大跌83%，主要受新能源車補貼減少拖累，並預告上半年業績全按年倒退70.9至82.5%。

儘管三月底高管預告過，下半年新款型號推出及六月新貼補方案出台，毛利率及業績會有改善，不過喺只爭朝夕的股市，有冇咁好耐性等黎明前的黑暗過去是一大問號！自三月底比亞迪發盈警後，沽空成交持續高企，似乎短期向50至55元方向調整的機會唔細。

煉油業務表現強勁

近日石油股發揮定海神針的功用，上周五中石化（00386）再升4.4%收報7.69元，表現搶眼。瑞信出報告唱好話國際油價預期今年可以平穩向好，中石化季績的一大亮點是勘探及開採業務恢復盈利，是近三年多以來首次。加上煉油業務收益維持強勁，市場也開始消化美國新供應的影響，化學品表現較預期理想，瑞信畀佢9.8元目標價，給予跑贏大市評級。

睇走勢，中石化股價距離兩星期前今浪高位7.76元僅一步之遙，跟紅頂白寧買當頭起，早排「侵侵」出口術壓油價都壓唔落，睇短期挑戰70美元關口機會好大。「三桶油」中，中石化以及中海油（00883）依然睇高一線。

古勝