Market Insight：大型內房股仍有睇頭

事實上，至少整個次季，內地出口會受國際貿易糾紛影響。要穩經濟，內需擔當重任。資產效應對於驅動內需可起四両撥千斤之效。所謂資產效應，就是非股則樓。股市方面，六月A股入摩係重頭戲，昨日內媒就預計，A股入摩或將帶來千億元的海外資金配置A股，而大金融、大消費及公用事業的龍頭股都會係呢啲外資重點配置的方向。

內需題材 選股主旋律

至於樓市，一線城市樓價不能升應該冇變，但基本上價格已趨穩定，而在利率上升之下，財務狀況較佳的大型內房仍有望跑出。最近大摩亦就內房發報告，話內房預售及一手銷售都有改善，建議首選股份為中海、碧桂園、旭輝控股（00884）及時代中國（01233）。

不過，圍繞內房最大的變數，乃利率上升的速度以及人民幣匯率表現，畢竟高槓桿特色仍然普遍存在於內房板塊，必須睇實呢兩個因素，一有唔對路轉身要夠快。

另消費股繼續有買盤捧場，蒙牛乳業（02319）及萬洲國際（00288）升3至4%。再睇三隻食品股，康師傅控股（00322）、統一企業（00220）同中國旺旺（00151）股價都正在延續去年的升勢，另見華潤啤酒 （00291）未負小股東期望，股價由年初24元升到上本月高位見38元，一六年供股的小股東真係飲得杯落！古勝亦睇好青島啤酒（00168），維持逢回吐作中長線收集的睇法未變。

美國政府對俄鋁（00486）的制裁立場軟化，刺激俄鋁股價急升逾四成並重2.2元樓上。古勝聽聞有對沖基金見隻股由4個幾碌到落2元邊就博撈底，點知隻股最低曾跌到落1.31元，依家又藉消息炒番上，少啲膽量都畀佢震走！呢啲Double or Nothing的遊戲，若唔係春江鴨，就要講運氣，自問兩樣都冇的話，就索性少啲煩惱。

金融改革帶旺港交所

執筆期間傳來香港交易所（00388）宣布最快六至七月起將有首批公司根據IPO新制度上市，由於涉及不同股權架構發行人，相關擬上市公司最低預期市值需要達到400億元，意味會多咗一批大市值股份掛牌，點計港交所收入都可以受惠。

雖然見港交所股價昨日未見有大動靜，僅升1.2%收報262元，而短線外圍因素影響市況難以猜測，惟長線港交所受惠於內地金融改革，業務前景具能見度，長線要上番300元不是夢，長情小股東可以少理短線波動，繼續坐定等收成。

古勝