絲絲講場：潘石屹披露影靚相「髮」門
SOHO中國（00410）董事長潘石屹做咗攝影發燒友，舊年十月開始發表作品，唔夠三個月就已經搞咗兩次相展。佢影靚相心得，就係最緊要有頭髮！潘石屹早前喺個分享會上傾到攝影，佢話：「拍照頭髮非常重要，所以像我這樣的永遠拍不好照片。」（點解？睇佢張相）
巨頭Model包括法國總統
佢今年一月喺北京嘅相展，展出佢過百幅人物肖像攝影作品。唔講水準，先睇吓畀佢做Model嘅Friend，包括曾任華遠地產董事長嘅「任大炮」任志強、京東創辦人劉強東、小米創辦人雷軍、復星國際（00656）董事長郭廣昌、聯想（00992）董事長楊元慶、雅虎創辦人楊致遠、李寧（02331）創辦人李寧、美團點評CEO王興……內地最有錢嗰班企業大佬，幾乎一半喺齊到！就連法國總統馬克龍都有份。
潘石屹話，自己企業家身份可以更好咁捕捉同佢一樣嘅企業家人群，以攝影去記錄時代喎。
佢仲搞咗幾次慈善拍賣佢嘅攝影服務，親自操刀為投得者影批相，包簽名，再加送一次同佢共享下午茶，舊年十一月嗰次拍得20萬人仔，今年一月嗰次拍得8.1萬人仔。
點解攝影，有段古，佢話自己小學畢業時，學校請來公社嘅攝影師影相，「我當時想，有錢了，我一定拍一張好照片。」到佢25歲時買咗人生第一部相機。
講到今時佢嘅攝影作品，佢話「我算是初學者，可是我有個優點——很勇敢。」佢明顯唔止勇敢，仲「有錢了」。
余絲韻