絲絲講場：興證周嘉儀撈埋導遊？

帶客遊大埔似旅行

話說Venus同成班同事用兩個月時間籌備嘅大埔一日遊「興證會」活動，日前順利完成。Venus話一大班人坐旅遊巴，覺得好有學生時代去旅行Feel，今次佢仲幫手做導遊，既緊張又興奮添。

點先可以跟團？絲絲問過Venus，佢話部分興證國際證券嘅高端客戶可加入由佢負責嘅「興證會」，該會成立咗超過一年，暫時有約一百個會員。

而今次係該會年內第一個較大型嘅戶外活動，有約60人參加，行程包括遊覽船灣淡水湖同參觀慈山寺，中午同夜晚就分別品嘗客家菜同盆菜，團員都滿載而歸。

佢話：「我哋大概每隔兩至三個月舉辦一項活動，之前有飯敍、賽馬觀賞，嚟緊就計劃搞品酒會、慈善跑、遊船河咁，畀來自唔同行業嘅會員認識互相交流，以及一家大細放鬆一下。」

唔肯透露入會門檻

點先可以入會？係咪資產或交易金額要達到一定門檻？Venus好口密唔肯講，可能要等大家親身開戶嗰時問問喇。

余絲韻