絲絲講場：財圈開十圍歡送周松崗

十個會到齊 小加或缺席

周松崗作為香港交易所主席，離別在即，自然大把人同佢告別。金融服務界十個會，包括中資證券業協會、中資基金業協會、中國金融協會、證券學會、證券商協會、證券業協會、貴金屬同業協會、證券及期貨專業總會、網上經紀協會，以及股票分析師協會，就已經訂咗枱同佢告別。

按每個會有一圍計，最少筵開10席，仲未計張議員嗰圍添！咁一圍大約有12人，即係最少都有百幾人到，主席幾有面子！

本來咁高興日子，會搵埋港交所行政總裁李小加，不過聽聞小加當日有事，可能嚟唔到。

十個團體仲好有心，將會送上紀念品畀周主席，類似係紀念冊或對聯之類，祝福佢將來生活更美滿、事事順利。物輕情義重，主席應該會好高興！

掌港交所6載 年年獻新猷

睇番周松崗掌舵港交所六年，本港金融發展迅速，又滬港通、深港通、債券通等，就連佢自己都話差不多每年都有大事發生，本港金融服務界應該搵唔少錢。

除咗十大會外，以往港交所主席退任，港交所一眾董事同高級管理層都會告別主席，相信今年都唔會例外，所以真係告別宴食唔停！好彩周松崗有做運動嘅習慣，每日都會做Gym，應該唔會咁易增磅啩！

余絲韻