絲絲講場:劉央6億煲騰訊 有堅料?

呢排十個有九個都講騰訊(00700),騰訊尋日收報419.6元,有「女股神」 之稱嘅西京投資主席劉央竟揚言,睇好騰訊股價二○二○年升到1,000蚊!信唔信好?劉央話佢之前私下微信過騰訊主席馬化騰喎。

私下微信馬化騰講股價

話說劉央尋日出席「彭博投資亞洲論壇」,佢講開自己以前喺騰訊5元同100元水平時入貨,不過之後已經沽咗,一直等待機會再買番。

所以佢特別多謝騰訊大股東Naspers早排減持,搞到騰訊跌穿405元,等佢有機會大手入貨。有幾大手?佢單日用咗6億港元咁囉。至於佢總投資額幾多?唔話你知喎!不過佢透露目前騰訊係佢旗下基金最重倉股。

劉央仲話,騰訊今次調整同基本因素無關係,話呢間公司已經由科網股發展成全方位綜合企業,仲睇好二○二○年騰訊股價可見1,000蚊添!

佢仲自爆同騰訊主席馬化騰私下有聯絡,今年一月底時佢先微信過馬化騰,提到自己睇好騰訊股價上千元,馬化騰仲答佢「穩健、穩健」添。

18年來首次增持內銀股

尋日講到買咩好,劉央話自己投資港股十八年以來,今年第一次增持內銀股,仲自爆買入「兩大一小」,強調今年係銀行股重要一年。咁依家入市好唔好?佢話現價追入就太遲嘞!

講到中美貿易糾紛,劉央唔認為係「戰爭」,而係兩國之間「競爭」,佢覺得美國總統特朗普喺社交媒體上言論成為股市指標係病態,佢話特朗普係完美嘅生意人,但就目光短視。Well,「目光短視」但完美?咁即係點?

余絲韻