絲絲講場：朱仔升呢百億富豪一年搞掂
賺第一桶金好難？偏偏有人僅用一年，身家就由千萬級進身「百億富豪」俱樂部，仲要冇父幹！呢個人就係近期麻煩纏身嘅Facebook（Fb）創辦人兼CEO朱克伯格。
Fb被指洩露用戶數據導致公司股價大跌，即使朱克伯格身家因而大縮水，不過佢個人財富增長速度之快至今無人能及。
近日有統計發現，福布斯富豪榜中，由千萬富翁升呢到百億富豪（按港元計）需時最短嘅人係Fb朱克伯格，佢只需一年時間，簡直飛躍，升呢時佢只得23歲。
股神要用廿幾年時間
第二快嘅係當今世上首富亞馬遜創辦人貝索斯，佢用多過朱克伯格一年，喺35歲先升呢百億富豪。睇番，微軟創辦人蓋茨都要五年，股神巴菲特、名牌LV老闆伯納德同墨西哥電訊大亨斯利姆等甚至要廿年以上！
統計發現，全世界有2,000幾人有近百億港元身家，呢個數字喺過去十年翻咗一番。呢2,000幾人當中，平均37歲就賺到近千萬港元，佢哋平均51歲就進身百億富豪，平均用14年就由千萬級升呢上到百億級。
呢批百億富豪中，四分一人有工程學學位，約五分一人有經濟學或商業學位，但三分一人連大學Degree都冇！睇嚟學歷與財富躍升速度關係唔大，關鍵係做邊行。分析顯示，搞科技係冇父幹而能成為百億富豪嘅最快途徑，平均只需7.3年。做邊瓣最快發達？睇吓個表。
余絲韻