Market Insight：券商股部署中長線

騰訊控股（00700）股價反彈至高位見438.6元，即幾乎上番配股前的水平，呢啲就係強者本色。中國聯通（00762）呢兩日股價落到9.36至9.4元區域終現支持，昨日反彈至高位見9.92元，收報9.84元，升5.5%，成交逾10億元。不過，聯通股價尚未脫弱勢，短線要提防彈散。

中美博弈以和為貴

事實上，三大中資電訊股呢兩年真係冇咩運行。無他，內地政府落柯打要減資費，而三者合組的鐵塔公司分拆事宜，講咗年幾都仲未見有咩進展。本來三大公司經營業務現金流穩定，偏偏喺投資者眼中如雞肋。呢個板塊，策略只宜喺技術指標極度超賣時小注出手博反彈，其他時候可以少理。

回說中美貿易糾紛，打起貿易戰的話，唔需要計邊個會受累多啲，反正唔會有贏家，兩國經濟會有不同程度受損，消費者亦要捱貴貨，並無可取之處。誠如古勝之前講過，一個破產多次的商人能成為美國元首，其商人本色肯定係極品級，即任何行為以最大利期為依歸，而唔係要搞對抗搵交嗌。

如無意外，今次中美雙方和平解決貿易矛盾，內地金融市場將進一步對美國開放，再迎來A股入摩。且別忘記，「侵侵」當選時講明要放寬金融業監管，透過股市製造財富效應來力挺經濟的招數，去年經已發揮得相當好，今年再用的話，可以為下半年的中期選舉造就有利條件。換言之，嚟緊全球股市好大機會仲會有高潮，且中美兩地金融業會係主角，信不信由你！

迎接金融市場榮景

內銀股陸續派成績表，老實講業績唔會同市場預期差太遠。反而未來內銀的發展，當中拓展其他保險等理財產品的空間或有所提升。皆因以往內險可以做內銀的業務，但內銀不可以做內險的業務，如今中銀監與中保監合併，組建中銀保監並歸人民銀行管，日後內銀或可拓展自家保險業務，有助開拓新收入來源，反而內險則會面對收緊監管的問題。

不過，論中資金融股，古勝依然鍾愛券商股，皆因內銀、內險的股價經已返回一五年大時代的價格或與之不遠，惟中資券商股普遍仍處低位，若然睇好內地金融發展，照計券商股係最值博板塊，第二季不妨把握低位作中長線布局，雖然預期行業下一個榮景的來臨仍需要時間，不會一步到位，但還是值得投資者耐心期待。

古勝