還記得金融海嘯後，華爾街薪酬制度受猛烈批評，減薪裁員此起彼落，事隔逾十年，華爾街優厚嘅花紅文化似乎故態復萌。紐約州審計資料顯示，華爾街銀行家舊年平均現金花紅按年升17%至18.42萬美元（約143.6萬港元），幾近追上○六年，即金融危機爆發前嘅破紀錄19.13萬美元（約149.2萬港元）。
睇番○八年，金融業劫後餘生，同年華爾街銀行家平均花紅只有略高於10萬美元。直至舊年，受惠併購市場活躍以及債券承銷收入增長，華爾街現金花紅水漲船高，花紅池總額314億美元，按年同升17%，與○六年同○七年高峰嘅330億至340億美元亦相距不遠。
有招聘專家指，有幾項因素促使華爾街花紅再次逼近紀錄水平，當中包括華爾街近年持續「Juniorization」（直接講，即係用啲Junior員工取代啲Senior），銀行業聘用年輕人，特別係科技方面，呢啲員工以現金支薪多過收股票。
此外，部分銀行喺一六年現金花紅相對壓抑，因銷售不良債券而被重罰嘅德意志銀行就停向資深交易員派花紅。
優厚花紅恐誘發不當行為，紐約聯儲銀行行長達德利度出「絕橋」，日前建議強制銀行高層以薪酬分擔監管機構罰款，藉此向銀行高管施壓，從源頭阻止不當行為與失誤。呢條橋，可能Work喎！
余絲韻