絲絲講場：科企巨頭創業5特質

1. 洞悉未來 獨具慧眼

一九七五年蓋茨喺哈佛大學讀咗兩年，佢留喺大學電腦房嘅時間多過溫書考試，佢當時已經深信個人電腦將會普及化，仲預視個人電腦必須靠軟件運行，於是就輟學創立微軟。

貝索斯一九九四年創立網上賣書嘅亞馬遜，當時連eBay都未「出世」，佢已經預視將來電子商貿會涉及賣任何一種產品。所以話，佢一開始時已經志不在賣書。

至於馬斯克喺○四年收到有人電郵邀請佢投資電動車，佢深信十年後電動車會流行，於是大膽投資咗750萬美元（約5,850萬港元），結果仲做埋特斯拉嘅行政總裁。當年笑佢「傻」嘅人，今時今日大概都笑唔出。

微軟 蓋茨

亞馬遜 貝索斯

2. 團隊信任 齊打江山

更重要嘅係，佢哋建立到信任佢哋嘅團隊一齊打江山！要得團隊信任，首要當然係佢哋先信自己嘅眼光，直頭係幾乎破釜沉舟嗰隻。

蓋茨選擇輟學去創業；而貝索斯原本係間投資公司嘅高級副總裁，絕對係公司明日之星，但亦放棄賺硬嘅花紅與高薪厚職，由零開始搞網上賣書。最後，馬斯克就夠膽掟錢落當時未有人睇好嘅電動車業務，完全唔計較負債風險。

3. 擁抱風險 目光遠大

佢哋三位都係放眼往後十年嘅轉變，目光遠大，但亦風險極高，一旦睇錯，難以回頭。事實上，有調查顯示，96%初創企業都係失敗收場。由此可見，想成功，必須要膽敢擁抱風險，要有接受失敗嘅準備。

4. 靈活發展 多向膨脹

佢哋三位所建立嘅企業，都傾向垂直或橫向整合。垂直嘅意思係，一種產品要多功能。至於橫向嘅意思係，收購功能相同嘅企業。而特別嘅係，呢幾間企業嘅整合，都係唔止純垂直或純橫向。

5. 毋忘初衷 奮鬥不懈

佢哋三位對所做嘅嘢，都有獨到嘅熱情，絕唔係「玩玩吓」，亦唔會「中途出家」轉第二樣（搞多幾樣就會），佢哋對所鍾情嘅範疇係由始至終咁奮鬥。

余絲韻