為咗吸引客戶注意，可以去到幾盡？有投資銀行使出「韓風」招式，難道要吸引愛K-Pop嘅大叔們？
瑞信亞洲投資論壇今年搞搞新意思，搵咗南韓上市嘅娛樂公司SM娛樂旗下女團Red Velvet做表演嘉賓，仲要係受邀請客戶先可以睇音樂會表演。喺表演之前，SM娛樂行政總裁金永敏會以「文化科技」為題進行演講。對呢個咁有新意嘅安排，有出席會議嘅基金經理話，唔少客戶咁遠嚟到，有少少娛樂都係好事。
除瑞信之外，今年一月有個大和資本市場香港行業分析師，Post咗條自己跟住男團Big Bang音樂跳舞嘅片，目的係喺一年一度嘅機構性投資者調查中拉票，唔通韓流又再興起？
要答呢個問題，睇睇股價可能最實際。南韓3大娛樂公司中，JYP娛樂年內股價急升54%；SM娛樂同期亦升28%；YG娛樂就差少少，但都有得升。南韓娛樂公司年內股價表現強勁，似乎值得大家留意多啲，睇Show都不忘睇股嘛！
余絲韻