香港證監會自一四年起每兩年就搞一次論壇，今年嘅論壇就定咗喺今個月十四號於會展舉行，入場費盛惠每位一千蚊！
有研討會「常客」同絲絲講，入場費一千元真係唔算貴，因為會議係全日，仲包一餐食，而且係喺會展搞，其他同樣規模嘅研討會，隨時要二、三千蚊！
有口痕友就話，其實出席論壇者，多數係金融機構同上市公司嘅高層代表，入場費根本唔係考慮因素，反而論壇嘅內容，即係證監會有咩訊息想帶畀市場先至為重要！
咁又係，今次論壇內容會探討證監會嘅策略、執法及監管情況，淨係「收料」都已是值回票價啦！
不過，有心水清者發現，根據論壇最初流程，香港交易所（00388）行政總裁李小加係會出席論壇嘅，而且仲同證監會行政總裁歐達禮喺同一專題討論環節出現，互相交流。
不過，到出論壇流程最終版本，發現小加總裁唔出席！咩事？冇乜嘢，只係小加本月十四日仍然喺北京開會，所以出席唔到論壇。今次論壇冇機會見到佢兩位嘅互動添！
余絲韻