絲絲講場：中燃劉總千金點做到學霸？
中國燃氣（00384）舊年十一月公布中期業績嘅同時，宣布公司總裁劉明輝嘅千金劉暢（Cathy）做佢細佬劉明興嘅替代非執行董事，睇番當時通告，Cathy絕對稱得上係一位「學霸」，先喺科大取得經濟學碩士學位，之後再喺美國康奈爾大學攞埋法律博士。
中燃尋日搞新春飯局，難得見到Cathy本尊，當然要請教吓佢點讀書啦！問到尊翁劉總當年係點樣栽培佢，Cathy笑言其實自己係嗰種無乜人管理嘅細路，爸爸一路以嚟都將所有精力擺晒落中燃，中燃先至有今日咁快速嘅發展！佢又謙稱自己唔係乜嘢「學霸」，與其講心得，讀書最重要嘅都係心態。
Cathy又話內地天然氣呢行發展空間仲係好大，自己亦都好鍾意呢個行業，但要學習嘅嘢仲有好多。
余絲韻