絲絲講場：貝索斯變身「超人死敵」？

山中建巨型萬年鐘

但爆嘅何止係貝索斯近萬億港元身家，更有科技友話，佢係超人（Superman）最大死敵－－邪惡科學家Lex Luthor嘅真身！

Luthor係DC漫畫內嘅超級反派，原本係超人兒時好友，超高智商，目標係砌低超人，支配世界。

貝索斯？Luthor？點解溝埋講？話說貝索斯周二喺Twitter發片，介紹佢呢六年幾嚟幫手喺美國德薩斯州一座山興建嘅巨型萬年鐘，個鐘高500呎，由地熱推動，每滴答一聲就係一年，世紀指針每百年行一下，每千年就報鳴一次。

呢個Tweet一出，成班科技友即刻話，佢搞啲咁嘅嘢，直頭係Luthor上身！

影響力似Lex Luthor

貝索斯有齊Luthor成個Package：同樣光頭、都係超級富豪、具驚人科技能力、愛探索太空（Luthor開發Lexor星，貝索斯亦有間Blue Origin發展太空旅遊）、控制具影響力媒體（Luthor控制晒大都會市嘅傳媒，貝索斯就係《華盛頓郵報》老闆）、同埋佢哋機械式嘅笑聲。

嗱仲有，舊年三月亞馬遜舉行年度機械人會議MARS，貝索斯駕駛一隻13呎高嘅機械人出場，即場仲問「點解覺得自己好似薛歌妮韋花（電影《異形》女主角）嘅？」畀人話佢十足十成日着住專用戰鬥機甲嘅Luthor，心嗰句似係「睇我幾勁幾邪惡」！

好嘞，按照劇情發展，Luthor會做美國總統喎，咁貝索斯跟住又會唔會都……

余絲韻