絲絲講場：亞馬遜物流員工變機械人？

全球網購一哥亞馬遜，股價升到嘭嘭聲，想繼續贏同行九條街，當然要出盡法寶將物流過程加快、再加快！最新嘅諗頭係安排員工佩戴手環，務求更快完成包裝及交付流程。之不過，咁樣好似將人當做半個機械人喎，各位絲巴打Buy唔Buy先？

話說亞馬遜一六年已申請專利，最近獲批，隨即引嚟四面八方討論！亞馬遜話，員工佩戴嘅手環會發射超音波脈衝及無線電傳輸，以確定員工位置，仲會配對員工位置及應處理嘅庫存物品，以便引導員工行去正確嘅箱攞貨，最終簡化物流程序，可以更快交貨。

做生意最緊要貨如輪轉，亞馬遜點會唔想呢！老實講，將員工機械化點止亞馬遜，美國Three Square Market將微晶片植入員工皮膚，聲稱可取代識別卡，但其實員工行蹤無所遁形，偷懶實畀老細捉到！呢間公司就有超過50位員工接受，但計絲絲話，把口就話接受，心入面可能……各位打工仔明啦。

余絲韻