絲絲講場：哥哥添B 細佬快結婚 晉安雙喜臨門

文揚孝順 棄醫從商

王文揚之前喺英國原來係做醫生，點解做做吓醫生走咗去買賣樓嘅？Ryan話原來一二年時，佢爸爸，即係主席王聰德同佢講有計劃退休，當時佢就同細佬Roland傾過，覺得公司平台好，發展空間大，打算返公司幫爸爸手，所以一四年九月Ryan就返咗晉安實業做嘞！認真有孝心。

Ryan仲話，其實做醫生同做總經理差唔多，都係分析數據，然後作出判斷，只不過係對象唔同，喺醫學上學到嘅知識可以用喺物業投資！佢依家喺公司做咗三年幾，非常適應！

家揚煩緊邊度擺酒

Ryan又透露，爸爸王聰德有一半時間處理家族慈善基金，加上集團企業化，業務穩健成長，投資決定有專業團隊負責，即使爸爸交棒，集團都有充分準備。

至於早前宣布「封盤」嘅細佬家揚，早排求婚成功，嚟緊準備迎娶被馬迷網友稱為「馬場女神」嘅Christine，不過佢就頭痕緊擺酒地方。佢同絲絲呻，話問咗幾間港島區酒店，但依家至農曆新年年初嘅星期六都Full Booking，得番出年年廿八先有位。仲叫絲絲有地方介紹，就通知佢咁話。

計絲絲話，如果搵唔到港島區靚酒店，可以考慮吓喺馬場擺酒吖，反正本身係馬主嘅Roland同Christine近年成日拍拖入馬場，應該有唔少甜蜜回憶啦！馬場界男神、女神喺馬場結婚，啱晒Feel！

余絲韻