下星期就係農曆新年，估唔到金融地產圈嘅利是封令人眼前一亮，今年設計狂Sell環保與教育，講潮嘅就鬥玩Emoji！
領展（00823）利是封標明用FSC（森林管理）認證紙，即是做紙嘅木漿來自可持續發展嘅森林。港鐵（00066）商場利是封就用「薯仔紙」，造紙過程中以Upcycling嘅薯仔澱粉作塗層；嘉華集團就用大豆油墨印，齊齊都有FSC認證。
新達廣場出齊5色Emoji利是封；但最鬼馬係渣打銀行，封面係傳統「如意吉祥」，封背先暗藏玄機，用Emoji砌祝賀語！
投資者教育中心平台「錢家有道」利是封嘅封底有字標明，叫人「先儲蓄，後消費」；銀聯就含蓄啲用豬仔錢罌做圖案，明啦。
余絲韻
