絲絲講場:40歲後理財7大忌

「四十不惑」絕對係真嘅!咪以為自己人生歷練多咗就我行我素,以下係40歲人常犯嘅7個理財錯誤,稍有不慎,害你一世!事關年紀愈大,賺錢能力就慢慢衰落。咪以為閣下未到40歲,呢啲唔使理,睇定剪存,警惕自己,以免日後追悔莫及!

1【買層負擔唔起嘅樓】

想要層大啲嘅樓?想住個好啲嘅校網?記住諗清楚自己嘅財務能力,唔好亂攞半生積蓄「較飛」。

2【揀逾15年嘅貸款計劃】

可以揀還款期較短,例如15年嘅貸款計劃。否則,如果你揀30年貸款,未還晒筆債都已經60、70歲,會打亂你嘅退休計劃。

3【花太多錢喺仔女身上】

安排仔女去補習班、樂器班、運動班等,全部都所費不菲。其實技能貴精不貴多,揀最適合嘅一、兩樣興趣班就夠,咪見隔籬屋啲仔女興趣班多你就跟。

4【為仔女付出所有退休金】

咁會搞到你退休生活無以為繼。其實仔女升學可以申請政府貸款,買得樓咁大個人亦好應該自己負責。再者,若你唔夠錢過老而要仔女供養,反而成為佢哋嘅負擔。

5【冇預足應急資金】

你家陣已經有個家,供樓、供車,仲有小朋友要養,每月有大量固定支出,如果突然冇咗收入,影響嘅唔係你自己一個,建議你預留三至六個月生活費作應急。

6【未做遺產規劃】

意外意外,當然係意料之外,所以你應該事先為家人準備好一切突發情況,包括你作為家庭支柱突然「走咗」的話,遺產應該點分配?有必要就買保險啦!

7【離婚冇爭取財產】

人生難測,離婚有時係情非得已,可能會令你嘅財政狀況180度轉變。你可能一直以嚟作為家庭煮婦/夫,根本冇工作經驗,又或者已經「4字頭」難搵工,離婚就難以維生。所以,離婚時一定要爭取自己應得嘅財產,記得要搵律師傾。

余絲韻