Market Insight：大折讓內房股博得過

昨日早市恒指曾跌過202點，但今浪特色是調整往往半日搞掂，午後見指數已經返到水平線上，尾市一度破過三萬三。自升穿31,958點後，技術上港股早就長空萬里，進入無阻力區，浪頂去到邊無得估。

反手做淡恐代價高

金融海嘯十年過去，多得全球央行濫印，後遺症係錢再唔值錢，股、樓、債以至藝術品市場統統都企住個高位。古勝有個睇法，今時今日虛擬貨幣即使隨時面對政府監管甚至被拉閘，但基於錢多到人類的投資產品無法容納，公仔紙都一樣可以炒到飛天，依家虛幣市場總值達5,500億美元（4.15萬億港元）。

相比起有數得計，市盈率未有耐去到過往股市高峰20倍樓上的港股，點睇都唔能夠叫得上好危險。即使不排除因為短期升得太急而有調整需要，但這類十年難逢一閏的大時代，仲要懶醒扮先知，不斷心思思估頂，唔買不特止，仲叻到反手做，隨時負上驚人代價。人生有幾個十年，唔好同個市鬥氣，順着大勢步步為營方為正路。

中資券商股繼續落鑊，早幾日介紹過兩隻心水，HTSC（06886）及廣發証券（01776），昨分別升5.3%及4.3%，中信證券（06030）更升11.9%，海通證券（06837）升4.3%，中國銀河（06881）升5.6%。

中資券商鑊氣未減

滬綜指錄得七連升，昨日收報3,559點，但係同勇不可擋的港股比較，或同一五年政策牛市高位5,178點相比，A股仲要升多四成半先返到家鄉。

截至上周五的一星期，A股散戶新開戶口升至30.4萬，乃一七年第四季以來最旺的一星期。當然，同一五年一星期過百萬新開戶口比，仲係蚊髀同牛髀，不過，呢個新開戶口回升的趨勢，唔追直接受惠的券商股，仲等乜？

拉咗閘十幾日的沿海家園（01124）昨日復牌，一度急升八成六創逾四年新高，埋單計升58.6%收報0.46元。公司同禹洲地產（01628）訂立協議，出售旗下持有七個項目的恒華集團股權，作價38億元人仔，估計收益8.34億港元。

隱藏價值有待釋放

話時話，雖然唔睇好今年內地樓市，單睇賣樓銷售逾5,000億元人仔的中國恒大（03333）都只係將一八年目標提高一成左右可見一二。不過，內地樓價同地價過去兩年累積升幅唔細，一啲中小型地產商，長期隱藏價值，折讓可以好大。好似沿海家園舊年每股帳面值都有1.1元，等於急升後股價都仲打緊四一折。

股民若博個市開始由一、二線股轉炒三、四線，唔怕等運到，不妨睇番啲資產折讓大的三、四線內房股，趁市旺睇唔中最多輸機會成本，好彩博中一隻半隻翻倍股就夠和味。

古勝