絲絲講場：機械人返工1周慘被兜
最近蘇格蘭連鎖超市Margiotta炒咗機械人Fabio魷魚，事關佢開工一個星期，就已經犯咗至少三宗罪！
愈幫愈忙 犯三宗罪
Fabio喺超市擔任服務員，主力幫客人解決難題，點知愈幫愈忙。第一宗罪：答嘢一舊舊！當客人問「啲酒擺喺邊？」Fabio只識答「喺酒區」或「喺雪櫃」！喂大佬，咁酒區同雪櫃喺邊先得（口架）？更激氣係Fabio應該要識答，事關英國Heriot-Watt University研發Fabio嘅時候，逼佢記晒間超市幾百樣商品嘅位置。
第二宗罪：聽力有問題。Fabio喺嘈吵嘅超市，成日都聽唔清楚客人講咩，所以問非所答。
第三宗罪：手腳慢。客人問佢某件貨放喺邊，佢最多係用「口」答，唔曉帶路。之後Fabio被「發配邊疆」去超市通道試食區站崗，點知比起其他人類員工，Fabio嘅吸客率極低，人哋平均15分鐘招攬到12個客，佢就只吸引到兩個客！
雖則Fabio係學咗幾招去討好客人，包括同客Say「Hello」、Give Me Five同抱抱！可惜老闆唔Buy員工只得呢幾吓花招，Fabio最終逃唔過被炒嘅厄運！
余絲韻