孖妹S檔案：H股全流通 點解有得炒？

新措施屬股權分置改革

尹：傲揚集團投資總監 尹滿華

林：資深財經專家 林一鳴

彩兒：新一年，我哋目標係要賺幾多？

Kitty：同大市睇齊。人有我哋有，應該夠喇啩！

彩兒：呢排港股連番破頂，北水狂流入港股。不如我哋一齊研究北水走向，睇吓有咩投資機會。

Kitty：H股全流通好Hit，依家買H股最好？

尹：唔好心急買住，等我講你知咩係H股全流通先啦。了解全局，就唔會人云亦云。H股全流通係股權分置改革2.0。股權分置改革1.0，即係A股全流通。

Kitty：求求你，用淺白啲嘅解說。

尹：No Problem！股權分置改革1.0同2.0嘅制度基本上差唔多，都指喺重新確定股權比例嘅基礎上，允許非流通股份逐步流通。惟兩者嘅分別係，一個針對A股，一個針對H股。

推行股改1.0前，A股上市公司有兩種唔同性質嘅股票，分別係上市流通嘅公眾股，以及不可上市流通嘅非流通股，呢兩類股份就形成咗「不同股不同價不同權」嘅市場制度同結構，係中國內地市場嘅一大特色。

Kitty：點解無啦啦有呢個股權分置制度？

尹：喺九○年，中國開始建立股市時，內地企業融資唔似依家要跟公司法規，設立公司及公開發行股票，只係作為企業內部改革服務嘅工具。所以喺市場流通嘅股份唔會多，而非流通嘅，包括國家、個人及機構持有嘅佔大多數。

傲揚尹滿華表示，H股全流通是股權分置改革二點零。	資深財經專家林一鳴表示，內地人在投資取態上較喜愛順勢而行。	投資者張匯川稱，等候首批試點企業出爐。

拉近大小股東高管利益

Kitty：之後點解又要改？

尹：慢慢發現股權分置呢個制度有缺陷，因大股東同小股東缺乏共同利益基礎，大股東持有嘅非流通股價值係以淨資產值計算，所以佢哋會以淨資產最大化為目標，小股東持有嘅流通股價值則以股價來衡量，佢哋會追求利潤最大化。

彩兒：要令淨資產增加，大股東可以做啲咩？

尹：增發或配股。因一般增發及配股價遠遠高於淨資產值，有助提高上市公司淨資產。此外，配股是向某特定人士發售新股，容易導致貨源歸邊，間接增加其股權。

Kitty：小股東好慘！

尹：唔止，由於公司股價表現唔係好關大股東事，所以喺股改前，上市公司董事會秘書處嘅熱線係打極都冇人聽，小股東求助無援。若打得通，又有人接嘅，佢隻股票買得喇！

尹：因此，有必要進行股改，令大股東、小股東同管理層利益一致，提升企管質素。再者，H股全流通係配合中國經濟增長步伐，市場全開放嘅進程。

喺○五年四月，中國證監會公布《關於上市公司股權分置試點公司有關問題的通知》，隨後推出兩批共46家公司進行試點改革。經歷咗一年多嘅股改進程，○六年六月中國內地證券市場就迎接第一隻以全流通形式上市嘅新股──中工國際（002051.SZ），以及股改第一股三一重工（600031.SH）原限售股份開始流通。截至○七年五月，滬深兩市完成或進入股改公司數量接近1,300家，佔應股改上市公司嘅97%。

彩兒：股改後，邊個較有So？

尹：通過股權分置1.0時，大股東有向小股東補償番少少，多謝佢哋分享流通權，送股送現金，平均每10股送3.2股，整體股本不變。大股東嘅股份由非流通變成流通，以市場定價，應該比淨資產值高好多，若即時套現，會和味至極！

Kitty：換轉我係大股東，我仲唔即刻套現！袋咗嘅錢先係自己，總好過帳面賺，有得睇，冇得使！

中資券商及港交所受惠

Kitty：邊啲股份值得留意？

林：中資券商股同香港交易所（00388）就會直接得益，因市場成交量增加，佢哋收入自然多咗。之前傳聯想控股（03396）同郵儲銀行（01658）等會率先開通，唔好誤會咗買佢至So，皆因唔理邊隻股，未來係咪有機會全流通，都仲要睇大股東造化。

尹：我估啲股份短線仲有沽壓添。

林：英雄所見略同。不過，沽貨唔一定代表公司前景黯淡，若股份係由某出名基金公司或恒指重磅股公司承接，佢啲股價仲唔趁機爆升咩。相反，若股份以低過市價沽，就係負面消息，股份料有一輪沽壓。

Kitty：長線呢？大股東都重視股價，佢哋係咪會落力啲搞好間公司，股價會飆。

林：我唔覺得有直接關係。

彩兒：聽講H股全流通係會分批落實，中證監早前宣布首批試點企業唔會超過三家。花旗估潛在試點企業包括郵儲銀行、中國電信（00728）、中國信達（01359）及眾安在綫（06060）等。好期待佢揭曉。

睇內地股友取態助部署

彩兒：H股全流通會唔會令更多內資股嚟香港上市？

林：呢個好自然啦，因喺內地上市相對難。其實喺過去一年，恒指升咗成萬點，都係因唔少北水湧入，內地投資者喺港股參與比例逐漸上升。

彩兒：我都略有所聞，北水帶挈今次連環破頂，但我有啲擔心，內地人投資取態同香港人慣用嘅HK Style咁唔同，我哋用開嘅分析策略係咪會冇咁Work？使唔使事先學吓佢哋點炒股？

留意內房銷售及大股東

林：傻啦，唔使學！但要知佢哋係咩Style！例如，內地人對內資股嘅認識比較多，例如對各內房龍頭股嘅房屋銷量多寡好敏感，所以碧桂園（02007）同中國恒大（03333）去年嘅強勁銷量，都喺佢哋嘅股價反映咗。另內地人十分留意大股東背景，香港人就側重睇公司業績。

Kitty：我仲以為股市暢旺，大家用盲舂舂Style入市就會賺。

彩兒：如果係咁，你唔使坐喺度啦。

林：此外，內地人較鍾意順勢而行，跟住個走勢行，股價愈升得多，佢哋愈鍾意買；相反，香港人若見股價升得太急，佢哋會驚而沽貨。內地人亦鍾意集中以較大注買幾隻股份，同埋習慣喺微信圈度同朋友仔分享炒股心得，你會想像到，若佢哋一齊重注某隻股份，嗰隻股份會炒到幾癲。

睇好科技鐵路內銀內險

Kitty：What 「A」 Style！

彩兒：呢排個市升穿歷史高位，你係咪睇好今年？

林：係睇好今年，H股全流通係其中一個升市誘因，依家大市處牛三，即係好多板塊嘅股份都一炮過升，升市莫估頂，隨時升到嚇死你！我睇好科技股、受惠一帶一路大灣區發展嘅基建鐵路股，以及受惠美國加息嘅內銀、內險股。今年六月，A股將納入MSCI新興市場指數及MSCI所有國家世界指數，A股ETF（交易所買賣基金）應該會愈嚟愈受歡迎，股價有望炒上。

全職炒家：公布試點企業即短炒

慣炒即日鮮嘅全職投資者張匯川（Raymond）稱：「目前我唔會買H股，因H股全流通令市場供應量多啲，最受惠都係港交所，其他好處就心理多過實質。」

「我等緊中證監宣布，邊幾隻H股係首批試點企業，到時我會入市短炒，到真正落實日前沽貨。我估啲大股東同樣會喺呢段時間推高公司股價，令即將流通嘅股份價格飆升，自己嘅財富進一步暴漲。當然入市時，仲要睇吓到時嘅市場氣氛同埋外資對該股嘅興趣。」

彩兒、Kitty