Market Insight：中美貿易摩擦 累港股

上周五臨收市的競價時段，恒指又再改寫歷史新高，升132點收報32,254點，令港股跨年升浪紀錄擴大至六個星期。騰訊控股（00700）及中國平安保險（02318）再發功，分別升1%及0.8%。抖咗幾日，內房股又再落鑊，碧桂園（02007）一度返到批股價17.13元樓上，雖然受制於10日線17.53元，最終都升3.1%報17.04元。華潤置地（01109）高位旗形整固幾日，上周五破位升7.4%報28.3元，創收市新高。

眾安可望短線見底

新股希瑪眼科（03309）上星期搶盡鏡頭，2.9元上市掛牌，四日炒上19.9元，周五終於停止升勢，隊番16.3%收報12.88元。IPO有貨者只係贏少咗，但已升咗幾倍先嚟高追就真係無謂。

之前幾隻凍資王，今浪完全無段好睇，好似香港第一隻FinTech股眾安在綫（06060），以59.7元招股上市，掛牌第六日見97.8元高位之後無段好睇，到舊年十二月落到62.5元先止跌，今輪跨年升浪佢完全無份，股價由本月初反彈到高位76.4元，日日跌些少上周五落返71.65元收市。

睇番眾安啱啱公布一七年保費收入，大幅增長74.7%至59.57億元人民幣，相比一六年的49.2%增長又再加快，營運表現唔錯之外，平保旗下的陸金所，最快可於三月上市，作為影子股及競爭對手的眾安，短期股價見底，亦有機會再落鑊炒過，不妨睇實。

古勝好明白，呢類十年難逢一閏的大升市，股友們殺得性起，家陣勸大家小心實唔啱聽。不過，今個星期真係要留意外圍形勢並唔係咁明朗。唔係講美國政府因為莫財而癱瘓，雖然話臨時撥款今晚知答案，但美國政府債台高築，類似事件唔會係第一次，亦唔會係最後一次，華府暫時拉閘股市早已是稀疏平常。上周五美股倒升，華爾街亦預咗可以大步檻過。

或再徵收懲罰關稅

反而近期十年期美債孳息矮仔上樓梯咁升，升到2.63厘創逾兩年高位，就一定要加倍提防。表面上，債息回升主要因為美國稅改通過，預期吸引企業海外資金回流，對提振經濟及刺激通脹的連鎖反應，債息先行一步。不過，有傳「侵侵」在兌現稅改承諾後，短期內會重新審視對華貿易，包括向光伏同鋼鐵業開刀，徵收懲罰性關稅。

與此同時，近日亦有中國官員話要重新考慮外匯儲備結構，可能減少買入美債。本來個市震咗一日就當無事，惟從近幾日美債走勢睇，似乎唔係靠嚇咁簡單，萬一中美貿易摩擦升級，始終企住高位的港股，調整可能會相當急速，大家記住要識得落車。

古勝