Market Insight：新股複製A股玩法

恒指過咗○七年的歷史高位31,958點，被視為揭開港股新一頁。不過諗深一層，當年美國次按爆煲，金融海嘯席捲全球，香港樓市只係跌咗年多時間，就因為聯儲局三輪量寬，全球央行大水猛灌下恢復活力，年復年屢創新高。反觀港股捱咗十年先爬番上高位，同樓市投資者相比，股民都幾悲哀。個市終於再登頂，都算守得雲開。

內險股太保仍落後

不過，上月初港股守住100日線開始往上炒，個幾月時間從28,134點攀升至昨日高位32,233點，升逾4,000點，累積升幅14.6%，今浪論速度同升幅都實在行得唔少，無論真係睇三萬三、三萬六都好，先嚟一次調整對後市發展反而更健康。

講到現時仲買得落手的，都集中喺內銀同內險股，中國財險（02328）昨日都作勢破位，中國太保（02601）明顯落後，今日睇佢可唔可以挑戰42.3元舊年十一月高位。

希瑪帶起相關股份

唔想話港股愈來愈似A股都唔得，恃錢多挾乾新股放紙鳶的玩法在香港照辦煮碗。希瑪眼科（03309）上市四日，由2.9元炒到上19.9元，最多升過5.8倍。

古勝搵港交所（00388）網頁內的花紙一睇，四間行包括招商、大摩、中銀同滙豐揸住12.1%，差不多佔公眾持股四成三，撇除後面兩間比較多散戶用的證券行，查實前兩者坐咗9.1%貨，等於公眾持股比重27.7%的三分之一。多少睇到點解股價如入無人之境，希瑪現市值154億元，一六年賺緊4,688萬元，咁旺嘅市況之下，一切基本因素分析都可以早抖。

在希瑪的漣漪效應之下，愛康醫療（01789）一度爆升84%，埋單升49.8%收報4.72元，一日成交已達15億元。另外，仲帶起埋現代牙科（03600）升26.4%，盈健醫療（01419）則升19.2%。

有基金老友講笑話，依家炒股好簡單，上午九點九搵十大升幅最多嗰隻，喺同板塊有成交照單執藥揀三、兩隻，下晝三點半食胡計數又一日。

古勝