Market Insight：部署龍頭股迎入摩

上實估值水漲船高

內房股繼續放紙鳶，碧桂園（02007）股價昨日上升7%，華潤置地（01109）升3%，中國海外（00688）則升5%。唔經唔覺，中海物業（02669）股價昨日以新高2.4元收市，總算冇令捧場客失望。以預測市盈率計，其實股價唔算係好貴，只係近月由1.8元水平踢到上2.4元，累升幅度達逾三成，故短線回吐可能性不能排除。

不過，中海物業有母公司中海集團做靠山，生意唔憂做，加上未來內地要大量拓展住房租賃市場，物業管理的需求處增長期，揸長線可以繼續安坐順風車。

除咗內房股，其實啲建材、貴金屬和煤炭股都有不俗表現，呢個情景係近年少見。照計今年六月A股入摩，外資唔會到六月先部署，未來兩至三個月會開始見到效果，所以凡係行業龍頭股唔怕坐，如果唔想揀冧巴，可以留意安碩A50（02823）及華夏滬深三百（03188）等A股ETF。

中資股氣氛轉佳，落後股中尋寶，古勝又記番起隻上海市窗口公司上海實業（00363）。去年以來股價主要在21至25元水平上落。去年十月股價見高位25.8元後反覆回落，跌至21至22元水平見支持，現已反彈上23元水平，昨日收報23.55元，成交明顯增加。

事實上，內房股板塊估值回升，上實逾半的收入來自物業發展及投資及經營酒店業務，其餘來自水務、基建及製造業務，照計估值都可以受惠利好氣氛。見到同系的上實城開（00563）都連現多支陽燭，昨日一舉突破前年第三季以來的阻力位，成交活躍，都唔爭在睇埋上實，博佢又重遊阻力區25元水平，回吐初步支持在22.5元。

紫金短線或升多浸

踏入一八年，金價似乎有番啲起色。昨日見到金礦股紫金礦業（02899）有不少北水買盤，股價一度高見3.5元，收報3.45元，升5%。

近月其股價累升幅度達四成，是估值由偏低至價值被重估的表現，去年及前年首季都出現過類似現象，到底到價未？古勝都冇水晶球，只係從圖表睇，已確認突破3.15元的三頂阻力，呢兩日股價升多浸唔係冇道理，短線升至一五年高位3.63元可能會有回吐，但只要守得住在3.15元樓上，整固過後仍有條件再向上衝。

古勝