Market Insight：新能源車掀爭奪戰

美股升穿25,000點關口，上任之後一直被人睇死的總統特朗普，繼稅改趕及聖誕前過關，加埋華爾街股市狂升，立即出嚟牙眨眨話道指下一個目標係三萬點。總統撈過界做埋股市分析員，姑勿論係咪二流果隻，美股上周五晚又升220點，港股夜期抽高130點，新加坡港股黑期企住30,900點樓上，預告今早港股高開機會相當大。

啤酒股炒風料短癮

有內媒話幾個啤酒品牌集體加價，加幅達到一至兩成。雖然青島啤酒（00168）澄清話原材料成本上漲，準備將部分產品加價，但加幅唔會超過5%。

不過，大牛市人人搵股票落鑊，往往睇標題唔睇細節，上周五青啤勁升10.8%，華潤啤酒（00291）升10.3%。客觀看，加幅無傳聞咁大亦只係為抵銷成本，要小心炒風都只係短期虛火。

美銀美林出報告將潤啤目標價上調至34.2元，話今次七年來首次加價，確認該行對潤啤加價抵銷成本上漲的想法，將一八年每股盈利上調3%至0.741元人民幣，維持「買入」建議，目標價較上周五收市價30.9元僅高一成左右。

講開酒，今年中國又發酒瘋，反完一排貪之後，白酒市場又回到以往的瘋狂，茅台在內地嚴重供不應求，炒價與建議售價幾乎起個孖，若非熟客真係一支難求，近日炒價已升逾2,000蚊人仔。在茅台有價有市下，貴州茅台A（600519.SH）股價創下746元（人民幣．下同）歷史新高，上周五市值9,275億元，比一樣係提煉一啲點得着火液體的中石化A（600028.SH）8,547億元仲要高8%，可見中國人真係飲酒大過天。

牌照成行業通行證

唔單止茅台股價急漲，五糧液（000858.SZ）市值過去一年都大升1.4倍去到3,138億元，如果放入50隻恒指藍籌秤一秤，經已同長和（00001）並列。常言道「有錢就係任性」，五糧液剛斥資24.9億元向內地奇瑞汽車收購旗下凱翼汽車五成一股權，白酒公司進軍汽車業，玩醉駕，不務正業是大多數人對交易的反應。

不過，回顧歷史，五糧液想進軍汽車業唔係新聞，曾經同華晨金杯合作最後無疾而終，目前仲係引擎製造商新晨動力（01148）主要股東，估計交易同中國暫停批出新能源汽車牌照，索性經收購攞張通行證，睇嚟中國要逐步取替傳統汽油汽車的大趨勢下，新能源車牌照會逐漸成為想染指汽車業公司的稀有資產。

古勝