孖妹S檔案：美日「勁股」舞 今年揀邊瓣？
「最心痛是，愛得太遲......」感情如是，買股亦如是。股友們一七年可能錯過咗好多「倍升股」，怨自己點解唔早啲買入。而當你放眼世界，發現原來「倍升股」多的是！適逢今日係二○一八年首個交易日，孖妹趁機搜羅一七年全球爆升股，發現美股同日股嘅「倍升股」，原來仲勁揪過香港股王騰訊控股（00700）！你冇睇錯呀！
2017兩地升勢堅：日股 胡椒食品進主板漲7倍
彩兒：弊！我呢兩個禮拜重咗3磅！條小蠻腰都唔見埋添！
Kitty：梗係啦，你咁多Party，成日食好嘢，唔肥就假啦。
彩兒：唉......唔講唔知，其實我係為工作犧牲，先去多咗胡椒廚房（Pepper Lunch）食牛扒。乜你唔知一七年表現最好嘅其中一隻日股，正正係經營胡椒廚房嘅胡椒食品服務（日股：3053）？佢嘅股價單單喺一七年就升咗超過7倍，股價由年頭594.8日圓，升到年尾嘅逾5,000日圓，十月時更一度高見8,213日圓，即係話相比一七年初，升咗12.8倍，高位計唔夠一年就變身「十倍股」！升得咁勁嘅原因，係股份一七年五月由喺創業板掛牌升到中小板，跟住再喺八月「升呢」到主板，股價自然跟住水漲船高。一年升兩級喎，你讀書嗰陣都未試過啦。
北方達人勁過任天堂
Kitty：哈，咁都畀你搵到位入。但全年計嘅話，我搵咗隻升得更加多嘅日股喎，但唔係你最鍾意嘅任天堂（日股：7974）！雖然你好鍾意捉小精靈，但任天堂一七年只係升咗近七成咋，相比同期升咗超過10倍嘅北方達人公司（日股：2930），真係小巫見大巫。佢係一間日本電商公司，業務包括網上賣保健食品、化妝品等，股份啱啱喺上個禮拜再創新高，稱得上由年頭升到年尾。
彩兒：升咁多真係唔簡單，所以我成日話女人錢最易賺。
美股 比特幣信託受惠狂潮
Kitty：一七年算係相對容易賺錢嘅一年，唔少資產都有得升，特別係虛擬貨幣，好似坐咗火箭咁。好多人可能都未識點買比特幣（Bitcoin），但其實有一啲相關信託可以經美股戶口買。例如，持有實貨比特幣嘅比特幣投資信託（美股：GBTC），該股一六年尾收報106.7954美元，一七年尾升到2,150美元水平。
彩兒：咩話？一年升咗十幾倍有多？
Kitty：係，我冇講錯，你亦冇計錯，一七年最高位計更一度升近32倍添！比特幣投資信託由一間叫Grayscale嘅公司推出，依家持有超過17.1萬個比特幣，計番每一單位信託約相當於0.09196847個比特幣。
彩兒：咪住先，以2,150美元買0.09196847個比特幣，即係要超過23,000美元買一個比特幣，但係依家一個比特幣價格約14,000美元水平，呢隻信託溢價都頗大喎！
Kitty：你好少計數咁叻喎。溢價反映咗市場對比特幣嘅狂熱，以及投資者可以省卻購買同儲存比特幣嘅麻煩，值唔值得畀溢價就見仁見智喇。之前就話一般人買比特幣冇乜途徑，但依家已經有比特幣期貨，比特幣交易所買賣基金之後又有機會面世，一旦出現估值修復就弊。再者，呢排比特幣價格大上大落，隻信託都大致跟住，如果喺一七年高位買咗，依家已經帳面蝕近四成，都咪話唔傷！
中概科網股普遍癲升
彩兒：計我話，比特幣走勢咁難捉摸，都係睇番啲科網股好過。好似一啲喺美國上市嘅中國科網公司，例如京東（美股：JD）、微博（美股：WB），至少都聽過公司名，而佢哋一七年都分別升咗約66%同157%，同期表現相對好嘅歡聚時代（美股：YY）更升咗近兩倍。
Kitty：確實係有得升，不過一七年喺香港買騰訊都贏一個開啦。不如睇吓專家預測一八年買乜嘢仲好啦！
2018專家捧咩股？：電競料倍升 瞄準NVIDIA
吳：海納資產管理董事 吳家順（Thomas）
Kitty：Thomas，收到風你公司啱啱喺一七年十二月出咗隻電競基金喎！
吳：冇錯，因為我極度睇好電競、大數據、區塊鏈、人工智能呢啲好陽光嘅行業，覺得係全球大勢所趨，個餅會一路增長，起碼仲可以炒幾年。
彩兒：電競呢排好Hit呀！雷蛇（01337）早前咪成為咗首隻喺香港上市嘅電競概念股。
吳：係，但我隻基金冇買。如果雷蛇有得沽空，我直頭會做淡添。我對雷蛇冇偏見，但就覺得佢估值高、冇錢賺、行業入場門檻低，唔係太睇好囉。其實成個電競產業鏈，我鍾意軟件同技術多啲，雖然開發成本相比做硬件高，但成功嘅話近似印銀紙。例如，騰訊嘅遊戲算係少少關事，但嚴格嚟講我喺香港未搵到啱嘅公司投資，所以轉咗去美日股市尋寶。
睇好Bitcoin概念及軍工
Kitty：可以分享有邊啲心水股嗎？
吳：哈哈，隻基金仲入緊貨，唔透露住喇。不過，想講晶片生產商NVIDIA（美股：NVDA）食正電競熱潮，我會繼續觀察佢嘅走勢。我相信成個電競相關板塊，一八年平均上升五成到一倍唔難！其他板塊方面，比特幣概念我覺得仲有得炒，始終市場上呢類公司選擇唔多。美國軍工股我都睇好，因預期美國一八年有軍事行動嘅機會頗大。
引同股不同權 科網發威
陳：東興證券（香港）研究部總監 陳鳳珠（Ellie）
彩兒：聽講你食過胡椒廚房。
陳：的確喺香港食過一次，質素普通啦。
Kitty：可能各人口味唔同，一七年胡椒食品服務股價爆升喎。
陳：我知道呀。當股價一年上升咗10倍、8倍，我建議有貨嘅投資者可以鎖定利潤先，減持部分股份，始終一般公司好難連續兩年都勁升。至於股價回落之後買唔買番，就要睇睇公司盈利增長能力等基本面夠唔夠穩健。
至於一八年，我比較睇好科網、手機設備、內險板塊，因為香港交易所（00388）落實喺主板引入「同股不同權」公司上市，料更多創新科技公司會來港上市，又或者中概股回歸，都有利市場焦點放番喺騰訊身上。
內險陣痛過後有錢景
彩兒：「股王」騰訊「王者再臨」唔出奇，但手機設備股呢排跌得好甘喎。
陳：的確調整咗唔少，但大趨勢冇變，手機零部件繼續要升級，研發技術高嘅龍頭如瑞聲科技（02018）、舜宇光學科技（02382）依然有優勢。至於睇好內險就因為中保監已經做咗好多收緊監管動作，有利保險行業愈嚟愈健康，加上一八年A股被納入MSCI，A股隨時有新一輪升浪。
Kitty、彩兒