絲絲講場:「扮工」累美企唔見7800億

老老實實,打工仔總試過開工時間無嘢做等嘢做,至多咪行行企企等運到或「扮工」?有研究報告話,就係咁,美國企業每年損失高達1,000億美元,即係唔見咗成7,800億港元,對經濟查實好大鑊!

22%打工仔認日日白坐

研究指出,呢個等嘢做問題各行都有發生,包括冇客埋嚟結算時收銀員喺度白坐,甚至係投行Banker喺度等同事畀資料先可以完成報表。

逾千受訪打工仔中,超過四分之三話試過開工時間無嘢做,近22%更加話日日發生。

理論上,員工有空閒嘅待工時間係好事,因為咁先有人可以應付突發嘢,亦等員工唞吓氣,以免佢哋透支仲易出錯。不過現實係,打工仔都會怕悶,若太少嘢做,寧願攤長嚟做,亦費事畀人見到自己無嘢做,怕會打爛自己飯碗。

要減少浪費人力,負責呢項研究嘅大學教授話,畀多啲嘢員工做並唔係辦法,事關好難確定邊個真係空閒,若分配不當,隨時搞到有人做死。

佢話應該鼓勵員工自己向上司舉手話得閒喎!又話管理層亦應該鼓勵員工冇嘢做時索性休息吓、放鬆吓、上吓網咁喎!Well,咁完美嘅世界,絲絲點敢話唔存在!

余絲韻