又到聖誕，未知粉絲們有無出外旅遊的計劃？我自己就無喇，不過個世界仲有大把人要坐飛機，未知是否因為呢個原因，三隻內地航空股中國國航（00753）、東方航空（00670）同南方航空（01055）的股價全部自十一月開始起勢咁抽上來，短短個半月多啫，累計的漲幅已經高達兩成半到四成了。
其實，行業落鑊又豈止係聖誕檔期的炒作咁簡單！亦都不是春運啫！如果係這樣的話，炒多一、兩個月便無貨賣啦！但實情唔係呀，我懷疑這三隻股仲可以玩多一年半載。
事關內地民航局於近來就實施了航空業的「供給側改革」，重點改善內地航空業的第一大問題─於內地搭過飛機的你一定知的，就是誤點的問題。以十一月單月計，全國航班的正常升降率據稱係84.59%（我要註明「據稱」），按年上升了7.17個百分點。
航班準時了，營運的效率就自然高。前陣子，當局又為內地航線的票價訂立新政，我於周三的專欄都話咯，買大陸股一定要睇準國策，了解國情，就是把客運票價的定價機制，從目前的政府指導改為市場調節。長遠來看，到二○年，客運航空票價的上限就可全撤！換句話講，即係有得加價囉！
再講，「供給側改革」的背後，必然離不開行業併購同重組，汰弱留強。大型航空公司的競爭優勢可以話係一面倒，未來的票價同利潤率的彈性都相當高，「提價」同「毛利改善」都會是行業於一八年的炒作主線。
三大航空股的市值於未來還有上升的空間。我首選南航，貪佢客運和貨運的數據都靚，話唔定，下年仲炒埋混改添呀！
富昌金融研究部總監 譚朗蔚（作者為註冊持牌人士）