Market Insight：趁機發掘中長線目標

香港今次未必加息

騰訊（00700）後勁不繼，400元得而復失，昨日收報393.2元，跌3%。騰訊股價回穩過後，相信暫時唔會有咩大驚喜。

周四凌晨聯儲局公布議息結果，基本上，市場對今次會議加息有晒心理準備，只係睇吓會後聲明對於明年的加息步伐有咩新消息。以最近美國的經濟數據唔差，照計聯儲局繼續按部就班加息的大方向唔會改變，不過，明年聯儲局舵手換人，對外對內會唔會有新人事、新作風，將受市場關注。

至於市場憧憬若美國今次加息，料可提振本地銀行股，古勝就認為今次香港都未必會跟隨加息，所以提振作用未必太大，尤其係市況唔太就，所以短炒相關衍生工具，宜注意風險。今年錯過股王升幅再怨都冇用，不如搵下一個目標仲好。在下認為，中長線有兩隻藍籌可睇好，就係滙控（00005）同港交所（00388）。

芬佬大戶齊捧滙控

早前中國平安保險（02318）披露持有滙控股權已逾5%，成為第二大股東，唔多唔少反映險企在資產日大之下，須要尋找優質高息又能分散市場風險的股票作長倉組合。

滙控正可符合條件，息率近4厘、市帳率僅1.1倍，低於國際同業，業務全球化，且財務狀況穩健，資本充足率充裕，相信未來會繼續成為北水長線吸納的對象。另一角度睇，查實喺恒指中，滙控同騰訊所佔比重差無幾。今年騰訊經已升咗好多，在基數增大之下，相信明年的升幅不可能如今年般倍升。港股要再起飛，人稱「大笨象」的滙控便身負重任，呢一點相信大戶們心中有數。

從股份流通量的角度睇，滙控本來就有班外資芬佬長期捧場，如今內地基金同險企都作長線部署，相信呢兩年街貨集中度已提高，只是其市值大，要好似如平保咁增持到要申報的水平不多而已。

貨源集中強者手，是滙控嚟緊要打贏翻身戰的一個重要條件之一，且看明年能否成為魚缸之升！

港交所不妨分注入市

今年港股創咗十年高位，但港交所股價仍未突破一五年高位唔在講，港股交投增，兼且港交所在拓展業務方面有進展，好似預期月底前有關設立創新板的定案會有眉目，明年還有ETF互聯互通。

內房股年尾難發圍

除非外圍大冧市，港交所應該唔憂冇運行，現時的估值仲係吸引，冇貨就要好好把握中長線吸納的機會。擔心年尾交投縮波動大的話，可以分注行事以降風險。

執筆期間傳來因開發商拖欠工程款，南京一幅地王樓盤被停工的消息。嚟緊內地二、三線城市出現更多呢類個案唔出奇，但好在近年多個城市有限購令，相信會引發房市硬着陸的可能性可以排除，就平常心看待行業淘汰賽即可。

對消費者而言，如果想喺內地置業，依家開始至三月初兩會前，都係官方調控內房的「緊縮」時間，反有利買家議價。不過，針對內房股，在下就維持周初的說法，即把握機會減磅為妙。

古勝