絲絲講場：賈躍亭列「老賴」限制消費
早排公開講暫時唔會回國嘅樂視創辦人賈躍亭又有新消息，今次係畀內地法院列入「老賴」名單，即是唔畀住一星級以上酒店、「坐飛機」、頭等火車等高級消費、購買不動產等等當然不在話下，甚至仔女都唔可以讀貴價私立學校添！
欠債4.8億 如揹破產令
有內地媒體報道，根據全國法院失信被執行人名單信息網站顯示，賈躍亭喺今年九月二十八日至今仍未能履行法院要求向相關單位還款，總共涉及差唔多成4.8億人仔，所以就被列入失信被執行人名單入面，亦即係「老賴」名單。
事實上，之前樂視控股同埋樂視移動就已經被法院列入「老賴」名單。
所謂「老賴」就類似香港熟悉嘅破產令咁，就係限制非必要性嘅消費活動，其中一條係包括「乘坐交通工具不可選擇飛機、列車軟臥、輪船二等以上艙位」，內地有唔少媒體就解讀為唔可以坐飛機。
咁究竟係搭飛機唔可以坐商務同埋頭等艙，定係完全唔搭得飛機呢？之但係假如佢唔搭得飛機，莫非要坐船先可以由美國返內地？！
專心搵融資 回國無期
事實上，賈躍亭嘅行蹤同近況一直係市場熱話，佢最近喺美國接受內地媒體訪問，話依家屋企連100萬都冇，而公司喺美國嘅所有房產都已抵押。佢自己依家就專心於造車嘅FF（Faraday Future），努力為FF搵融資，仲話因為怕債務糾紛限制佢出境，所以暫時唔會返內地。睇怕依家有埋「老賴」纏身，賈躍亭回國嘅時間表可能更加遙遙無期喇。
余絲韻