過去幾日，大家也吃了不少驚風散吧？港股是好cheap的，從來都無自己的個性，最易受外圍所擺布。近來A股市況不穩，權重的績優股跌跌不休，好似貴州茅台（600519.SH）咁，股價自高位已經回落了不少。
香港的強勢股咪又一樣，騰訊（00700）同中國平安保險（02318）都跌足幾日，大市又會好得去邊！恒指自30,199點高位回落，到昨日10日線都曾失守過呀，真陰功！
你知啦，我等乃係典型的牛市大好友，指數破頂了就也文也武，叫人買呢樣、買嗰樣。到個市跌喇，就預咗畀人圍！我的粉絲從電視問到網台，再從網台問到Fb，無非都是想知道我對後市的睇法有無改變，大市係咪已見大頂云云。我的睇法當然就無變啦。不過，我都好理解大家的心態，錢搣開來有血有汗！所以我想借本文同大家打番支強心針先！
其實有好多人於分析一個指數同個股時，都犯了一個錯誤，就是太過自我中心喇，往往都是從自己的買入點來出發。即是如果股價是浮於水面的就開心，沉於水底的便哭喪着臉，動不動叫減持。其實，真正的分析並唔係咁！你要分析的，應該是資產價格本身有無走樣至真！比如是有無跌穿到支持呢？舉個例，恒指自高位雖然是回落了近600點，但最近嗰條10日線仍然守得住，驚咩？
撫心自問，散戶們次次見個市一回調就喊咁口，無非是因為跟車太貼於高位攞了貨，至令到自己的倉位咁弱不禁風，進而搞到精神緊張，健康回吐就當是熊市來臨！
收筆前，我奉勸大家一句：牛市裏「一係就唔買，買就唔好驚！」自問膽量唔夠的，咪唔好跟車太貼囉！好似我咁，所有貨都不是30,000點樓上買的，個市近日調整，我手上的盈利都仲未嘔凸。我OK喎，個市跌完，好快啲升喇！
富昌金融研究部總監 譚朗蔚（作者為註冊持牌人士，持有騰訊）