絲絲講場：唔係啩！Bitcoin之父係馬斯克？

雖則馬斯克周一喺Twitter發文否認，仲話自己連朋友畀佢嘅一批Bitcoin都唔記得放喺邊，佢同日仲發Tweet話自己係火星人！邊句真？唔知呢。所以，呢個話題喺虛擬貨幣界繼續熱議。

有人話預備喺火星用

支持者就話，馬斯克好熟創建Bitcoin過程使用嘅電腦程式語言C++；加上中本聰（Satoshi Nakamoto）個名嘅英文字母可以組合出「So a man took a shit」，咁搞嘢嘅化名，絕對係馬斯克風格；又話佢發明Bitcoin，係預備將來喺佢最想去嘅火星用。

仲有人話，馬斯克當年創辦PayPal已經係電子貨幣革命，之後佢將PayPal賣畀eBay，單交易有不可競爭同保密條款，所以唔可以講人知係佢發明Bitcoin喎。

不過反方就話，Bitcoin喺○八年面世，嗰年馬斯克事業、錢同感情都處於低潮，仲邊有心力開多瓣Bitcoin？而且佢份人咁愛出風頭，若係佢，又點忍到唔自爆！

誰是中本聰？《新聞周刊》一四年話係美國加州日裔電腦工程師Dorian Nakamoto，人家否認兼告埋雜誌侵擾佢。去年又有個自稱網絡安全專家嘅澳洲人Craig Wright向BBC、《經濟學人》及《GQ》話自己係，不過信嘅人有限。咁馬斯克？信不信由你。

余絲韻