我有事宣布：各位觀眾，牛三正式展開！唔係講笑。前排我講過，從媒體報道以至到市場氣氛所見，IPO市場都已步入牛三，但大盤未係；今日的兩極就倒返轉喇，半新股隻隻沉淪，個個坐住隻易鑫集團（02858）We嘩鬼叫，相反大盤、藍籌就威威喇。
其實，這個咪資金輪動囉！就好似過去幾日，北上滬股通同深股通都錄得淨失血，而南下港股通就獲得創紀錄的淨買入喎，咁你就知道為甚麼滬深兩市於日前震盪積弱，相反我們的恒指就節節上升啦！
恒指於昨日開市無耐就升了三四百點，半日的成交更增至800億元。至於我的大寶騰訊（00700）更加一度衝上439.6元的新高，收報430蚊。我的粉絲持貨了14個交易日咋，已經輕鬆賺過兩成，仲未計衍生工具的派彩添！
恒指借住騰訊、吉利汽車（00175）同港交所（00388）這幾隻我於兩周前叫大家入定貨、等爆升的牛股，再加上友邦保險（01299）同中國平安保險（02318）這些突破了all time high的大股，終於帶領恒指升557點，突破29,800點大關，而主板成交增至1,570億元。無論從點數以至到大市的交投來睇，我睇唔到係「假升」！
收市無耐，期指市場又現異象：就是有800幾張涉資五千餘萬的即月期指於31,341點交易過！大時代2.0喇今次！古語有云：「上帝要你滅亡，必先讓你瘋狂！」算罷啦，這句說話不會是出自我把口的，我七月已同大家講「anything but cash（買咩都好，咪揸現金）」。到今時今日仲包拗頸的，不外係無貨想追貨，但又等唔到個市跌的人。
講真，乜個市好唔健康咩？我又唔覺喎。大把重磅的藍籌排住隊準備輪動啦！我不是講中國移動（00941）同聯想集團（00992）呀，就好似滙豐控股（00005）都未發力，個市仲有排未撞山！不過，我認為這一刻仲未到佢，等友邦行多幾日先啦！
富昌金融研究部總監 譚朗蔚（作者為註冊持牌人士，持有騰訊）