絲絲講場：跨國巨企最想請咩人？

LinkedIn要夢想遠大

LinkedIn行政總裁Jeff Weiner話，佢對員工有三個要求：遠大夢想、懂得享樂、能夠做好分內工作。

以絲絲嚟睇，後面嗰兩點好多人都會有，至於「遠大夢想」就……嗱！中六合彩應該係唔算嘅。

有啲老闆就愛招某類人，好似美國人氣糖果舖Dylan's Candy Bar老闆Dylan Lauren，講明Like外向兼社交能力高嘅員工，傾向請啲娛樂行業出身嘅，話佢哋通常表達能力比較高。

Tesla出謎語測試邏輯

事實上，Dylan Lauren本身係著名時裝設計師Ralph Lauren嘅千金，自不然同娛樂社交圈親近啲！

至於Tesla創辦人馬斯克（Elon Musk）喺面試嗰陣時，有時會用謎語去測試一吓應徵者嘅邏輯能力，同時佢亦好注重同事之間嘅關係，絕對唔容許同事之間有互相中傷或針對。佢仲話，有兩個特質係Tesla行政總裁必備嘅－－解決問題嘅能力同良好工作態度。

Well，佢自己咪係CEO囉，咁即係讚自己？

Facebook營運總監桑德伯格（Sheryl Sandberg）就話，佢只係需要一種人，就係建設者！「Facebook嘅發展只係剛剛起步，所以想搵有能力之士幫手研究科技產品，可以帶領公司向前。」特定背景同埋技能並唔係招聘嘅主要考慮因素。

桑德伯格想要有能力而又與公司同理念嘅人，能令世界更開放同埋令大家連結喺一齊咁話。

喂，以上邊款啱你？

余絲韻