孖妹S檔案：專家：明年真正高潮

吳：今年恒指升得差唔多喇，好快會衝上30,000點。真正高潮應該係出年，大家留意住財經版B1嘅新聞幾時擺去港聞A1，咁就係高潮。

許：我估計一八至一九年港股會回調，但未至於股災。

Lukas：係！全球經濟已有清晰信號顯示，全球經濟周期接近尾聲，好多股票都太貴。

所以，我希望一八年全球股市會抖抖，股票價格波動大啲、債息高啲、風險溢價亦會高啲，唔好令全球股市爆破嘅泡沫愈谷愈大。

Kitty：摸摸個水晶球，繼續話我知你見到咩？

彩兒：可唔可以講咗中美股市先，最貼身，對港股影響最大。

華債務惹憂 美經濟放緩

Lukas：好！基於政治考慮，中國要維持經濟高速增長步伐，導致債台高築，私有企業債務總值超過中國國內生產總值嘅2.2倍，接近10年前水平嘅兩倍；今年九月份標普自九九年首次下調內地主權信貸評級。我擔心中國債務危機遲早會爆煲。

一八年美國面對人口老化、生產力增速減慢及更趨鷹派嘅緊縮貨幣政策等，經濟增速將減慢至逾2%。

至於歐洲經濟增長應該會達標，預計歐洲央行會持續縮減購債規模，並維持存款負利率。另一方面，英國啟動硬脫歐程序遲遲無進展，若一八年春天都無達成共識，同歐元區嘅雙邊貿易真係凍過水，將會拖累英國經濟。

彩兒：你有冇做咩防禦措施？

許：暫時唔會沽貨，會等Signal先，一旦恒指跌穿60天移動平均線（約28,210點）再沽貨都未遲。

吳：我日日炒，好難避開冧市，但我有信心走得比人快！