孖妹S檔案：全職股民教你長短炒心法

許：全職股民 股皇上（許浩彰）

吳：全職股民 吳德華（Meta）

Lukas：荷寶投資解決方案組首席投資官 Lukas Daalder

揸中長線 年賺過百萬

Kitty：聽講你今年賺過百萬！唔通你日日金睛火眼？

許：我都幾懶，唔係成日睇住個市，但仲算懶得起。

彩兒：唔使狂入市？唔通你用價值投資？我聽到有位內地基金經理倣效巴菲特嘅價值投資法，揚威海外，其投資基金雨山尋牛1號，淨值截至今年十月三十一日，12個月內成功翻咗逾三倍。

許：咁啱啫，我都係睇長線。唔似大多數全職投資者，我唔炒即日鮮，因頻頻交易唔會賺得晒個浪。相反長線投資，盡量揸貨揸足成個浪之餘，睇嘅嘢仲會宏觀啲。我習慣睇過去8至10年嘅走勢，分析港股嘅頂同底，然後買股長揸。

Kitty：唔日日炒，收入夠唔夠食？

煲港交所 炒美郵輪股

許：我通常唔會做月結，自己嘅投資回報多用港股嘅一個浪或以一年做單位。依家個升市未完，但計今年年內嘅收入，都有賺過百萬！

Kitty：今年恒指升咗好多，你今年一定最好賺！

許：未必，我上年賺得仲多。去年恒指19,000點時，我已估個市係牛一。今年初我已瞓身買，覺得個市升硬，但升到年中，我有啲猶豫，所以錯失恒指由24,000點上到27,000點時嘅升浪，其後喺27,000點以上再買番。

彩兒：你猶豫，係因覺得個升市唔尋常？

許：今年升市主要由恒指重磅股帶動，如騰訊控股（00700）。我嘅投資成本加埋成幾百萬元，梗要小心。最近港股成交額連續6日超過1,000億元，我睇好基金同券商股，單係香港交易所（00388），就用咗成一百萬元買。我亦買咗中金公司（03908），13.8元買入，帳面賺緊每股幾蚊。因騰訊入股，更睇高一線。

Kitty：除咗港股，你仲有咩投資？

許：炒美股！我睇宏觀經濟，當然睇埋美國。面對人口老化問題，我估好多美國老人家會去享受吓，坐吓郵輪周遊列國，會帶旺美國旅遊業。所以我買入皇家加勒比郵輪（NYSE：RCL）。我亦睇好英特爾（Intel），佢同寶馬（BMW）聯手打造無人駕駛汽車，打算二○二一年投入市場。識緊貼AI潮流，前景可期啩。

不宜正反兩邊同時玩

許：想炒得叻，要慢慢累積經驗，我做全職炒家做咗十幾年。我試過輸好多。○八年玩牛熊證，初初恒指由20,000點跌到16,000點，初初一路沽一路賺，賺得幾多，之後估底睇升，惜反手反得太快，搞到輸番晒。經過嗰次，我學識唔好正反兩邊同時玩，同埋玩衍生工具，注碼唔可以太多，否則太冒險。

Day Day Trade 專攻股仔

Kitty：點解炒股炒咗6年，突然喺半年前轉做全職？

吳：全職炒股可以有多啲時間鍛煉投資技術，錢就自然嚟。半年前，我發現自己純炒股，每日都有穩定收入，所以就決定放棄做補習，全職炒股。現時每日平均有20次交易，每日買賣成交額逾一百萬元。

Kitty：每日Trade一球貨！每日賺幾多先夠？

吳：淡市賺1,000元算合理，若賺5,000元就幾滿意。

彩兒：點知自己投資技術去到咩水平？

吳：好簡單，你嘅收入就清楚反映，呢半年我自己係炒得叻咗。

Kitty：今年市旺，錢應該較易賺，唔可以做標準喎。

吳：你錯喇，今次升市係非常難賺錢！因今次升得唔全面，都係幾隻大價股爆上，我自己唔係好有錢，所以無揸科網股，惟有眼白白睇住佢嘅股價屢創新高，但自己荷包無進帳。

吼股民動作 做相反部署

Kitty：咁你平日炒開咩？

吳：我炒開細價股即日鮮。短炒難睇將來，所以我冇咩理佢哋嘅基本面，有時就算知間公司蝕緊錢都照買。我平日會睇新聞、公司公告，以及每日升跌幅榜，然後留意股價走勢、聽消息同睇布局，今年有買入建成控股（01630）及保利協鑫能源（03800）。

彩兒：炒股搵食壓力大，你有咩妙法？

吳：好多人衝入市，我就要諗定食胡；好多人逃跑，我就諗定入市。我會好靈活調動資金，唔會預先話揸幾耐，睇市況同股價做人，見股價有咩異動，就會走人先。

我唔會信小道消息，因傳番嚟嘅消息好可能已經遲咗；另外，若我係想靠運氣賺錢，寧願去賭場或買六合彩好過。

仲有，市值細過十億元嘅股份，若無啦啦畀好多人識，我嘅戒心會大啲。

忌着眼單次戰績 拉勻睇

Kitty：你同我傾咗咁耐，我會唔會阻住你發達？

吳：唔會，即使睇漏眼，可能有時會賺少咗，但有時可能救咗我呢。

做得全職炒家，就要識得調節投資心態，贏嘅時候唔好太興奮；輸嘅時候亦要輸得起。特別喺旺市，贏得快，輸得仲快；喺淡市，散戶唔敢郁，主要係高手過招，有時輸少當贏咗喇。做得全職炒家亦唔應該着眼某次贏輸，要拉勻全部睇成績，一般20個得1個成功，係唔易。

Kitty：若我要學你全職炒股，第一步要做咩？

吳：你夠早起身先講啦。

若有料報畀彩兒同Kitty或有嘢問，可電郵money.biz@on.cc

Kitty、彩兒