Market Insight：比亞迪趁勢搭順風車

萬億元營收非空談

今年車股表現一枝獨秀，隻新能源車代表比亞迪（01211）因為業績麻麻，到九月先至開車，一口氣由45.85元衝到上83.7元。近個幾月相對靜局，但啱啱被內媒透露出老總王傳福在一個高層會議上帶出比亞迪中長期規劃藍圖，包括要打造百年老字號，為品牌形象帶來新使命。

口號式目標可以唔理，但另一個數字古勝反而有啲興趣，比亞迪要在二五年之前，實現萬億元人仔的營收目標。舊年比亞迪營業額1,000億元人仔，九年後上萬億，即係複合年增長率約29.5%，同一三至一六年的26.2%唔算超出好多，但基數大咗，要保持相同增長並唔容易。

然而，大環境係中國工信部落咗order，未來要全面取替石化能源汽車，國策傾斜，新源能車未來幾年在內地市場大把世界，比亞迪的新目標未必係得個講字。

十年目標可能對股民太遙遠，但十月股價回吐，最低落過64.7元，啱啱係今輪升浪升幅的一半，可以視為短炒的止蝕位，短期有消息配合，不妨搭番轉順風車。

大市有嚴重依賴症

睇番騰訊，多間大行加入大合唱行列，更唱到606元目標，騰訊上周五升11.6元收報403.4元，折算係一四年一拆五前舊價去到2,017元。

股王點勁都要抖氣

十三年前以3.7元上市，累升544倍。唔計啲莊家仙股紙鷂，股王的成就經已前無古人，會唔會後無來者？要碰啱一個時代技術革新，13億人口市場加上國家協助高度排外幾乎沒有競爭對手之下煉成，恐怕可一未必可再。

上周五恒指雖然高收，可是逾900隻股票插水。大市依賴騰訊、中國平安保險（02318）幾隻重磅股頂住，兩極化情況嚴重。值得留意，是美國開始收水，又臨近年底的內地水緊季節，內地十年期國債孳息持續上升，上周中一度重返4厘樓上，創近三年高。

缺水的影響，上周A股有轉弱迹象，短短三日連番跌穿10日、20日及50日線。依家港股對北水的依賴相當高，要小心騰訊炒業績衝埋呢浸，會開始受地心吸力影響。

散戶睇住沽空搵食

港股A股化早就係公開秘密，如果唔啱內地大莊家或大媽口味的股份，想搵人炒都難；相反，只要佢哋啱嘴形，估值高低完全脫離同類公司都唔係問題。以沽空做淡起家的渾水（Muddy waters）創辦人最近接受訪問，都話港股與中國股市界線愈來愈模糊，市場充滿操縱，依靠基本因素進行沽空，已經好難搵食。

散戶同基金經理最大分別是注碼的分野，基金在單一股票落注規模必然比散戶大得多，轉身難亦容易被有心人經「花紙」圍到飛，尤其相對少人玩的沽空，數飛之後挾爆，今年已經屢見不鮮。不過，對渾水的煩惱，或者係散戶的另類參考，搵啲沽空異動又跌唔落的股票，近一年市旺下，經常都有意外收穫。

喺本月十日半新股眾安在綫（06060）加入咗可供沽空名單，呢隻出名貨乾市值大的股票，掛牌後衝過上97.8元之後陰陰落，睇個勢又係要引足夠淡友進場，之後先上演大屠殺，大家不妨留意住佢。

古勝